पुणे : कसबा विधानसभा पोटनिवडणुकीसाठी काँग्रेसमध्ये अनेक इच्छुक आहेत. निवडणूक लढविण्यासाठी दहा अर्ज आले आहेत. त्या अर्जांची चाचपणी सुरू असून, तीन फेब्रुवारीपर्यत उमेदवाराचे नाव निश्चित आणि जाहीर केले जाईल, असे काँग्रेसचे प्रांताध्यक्ष नाना पटोले यांनी येथे सांगितले.
कसबा विधानसभा मतदार संघाच्या आमदर मुक्ता टिळक यांच्या निधनामुळे पोटनिवडणुकचा कार्यक्रम जाहीर करण्यात आला आहे. पोटनिवडणूक बिनविरोध न करण्याची भूमिका भाजप विरोधकांनी घेतली आहे. काँग्रेसकडून निवडणूक लढविण्याचे जाहीर करण्यात आले आहे.
काँग्रेसचे प्रभारी शहराध्यक्ष अरविंदे शिंदे आणि सहयोगी नगरसेवक रविंद्र धंगेकर यांच्यात चुरस आहे. या पार्श्वभूमीवर बोलताना नाना पटोले म्हणाले की, कसबा विधानसभा मतदारसंघ पूर्वी काँग्रेसचाच होता. कसबा मतदार संघ काँग्रेस पुन्हा मिळविणार आहे. पोट निवडणुकीसाठी दहा अर्ज आले आहेत. त्याची चाचपणी सुरू आहे. तीन फेब्रुवारीपर्यंत उमेदवाराचे नाव जाहीर केले जाईल.
