पुणे : खडकवासला धरणसाखळी प्रकल्पातील चारही धरणांमध्ये यंदा गेल्या तीन वर्षातील सर्वाधिक पाऊस

हेही वाचा >>> जेजुरी : राजे उमाजी नाईक आर्थिक विकास महामंडळ स्थापन करणार- फडणवीस

पानशेत धरण ११ ऑगस्ट, तर वरसगाव हे धरण १३ ऑगस्ट रोजी १०० टक्के भरले. खडकवासला, पानशेत आणि वरसगाव ही तिन्ही धरणे भरल्यानंतर टेमघर धरण १९ ऑगस्ट रोजी पूर्ण क्षमतेने भरले. गेल्या पाच वर्षांपासून या धरणाची दुरुस्ती करण्यात येत आहे. त्यामुळे हे धरण पूर्ण क्षमतेने भरण्यात येत नव्हते. मात्र, गेल्या दोन वर्षांपासून टेमघर धरणाची गळती ९० टक्क्यांपर्यंत रोखण्यात यश आल्याने हे धरण १०० टक्के भरण्यात येत आहे, असे जलसंपदा विभागाकडून सांगण्यात आले.दरम्यान, यंदा ऑगस्टपर्यंत टेमघर धरण परिसरात २९८२ मिलिमीटर, वरसगाव धरणक्षेत्रात २१६३ मि.मी., पानशेत धरणक्षेत्रात २१७१ मि.मी., तर खडकवासला धरण परिसरात ५२४ मि.मी. पावसाची नोंद करण्यात आली आहे. टेमघर, वरसगाव आणि पानशेत या तिन्ही धरणांमध्ये गेल्या तीन वर्षातील सर्वाधिक पावसाची नोंद करण्यात आली आहे, तर खडकवासला धरणात मात्र सन २०२१ आणि सन २०२० मध्ये यंदापेक्षा जास्त पावसाची नोंद करण्यात आली होती, असेही निरीक्षण जलसंपदा विभागाकडून नोंदविण्यात आले.

गेल्या तीन वर्षांतील चारही धरणांमधील पाऊस मिलिमीटरमध्ये
धरण             २०२२ २०२१ २०२०
टेमघर           २९८२ २४६४ २६३५
वरसगाव        २१६३ १६८६ १९१७
पानशेत         २१७१ १७१३ २०१०
खडकवासला ५२४             ५३१             ६७१