कोथरूडमधील डुकरांचा मृत्यू नेमका कशामुळे…गूढ अखेर उलगडलं

डुकरांवर कोणत्या माध्यमातून विषप्रयोग झाला, याचा शोध महापालिकेच्या आरोग्य विभागाकडून घेतला जात आहे. यासाठी कोथरूड परिसरातील नाल्यामधील पाण्याचे नमुने घेऊन त्यांची तपासणी करण्यात आली. या तपासणीत पाण्यामध्ये विषारी पदार्थ आढळून आले नाहीत. त्यामुळे कोणी तरी खाद्यपदार्थांमधून डुकरांना विष दिले असण्याची शक्यता आहे. डुकरांच्या मालकाचा शोधही घेण्यात येत असून, तो सापडलेला नाही. त्यामुळे या विषप्रयोगामागील नेमके कारण समोर आलेले नाही, असे डॉ. फुंडे यांनी स्पष्ट केले.

डुकरे पकडण्यावर भर

महापालिकेने शहरातील डुकरे पकडून त्यांची कत्तल करण्यासाठी ठेकेदार नेमले आहेत. हे ठेकेदार डुकरे पकडून कत्तलखान्यात पाठवितात. महापालिकेच्या ठेकेदाराने कोथरूड परिसरात ६ ते १७ फेब्रुवारी या कालावधीत १७१ डुकरे पकडली आहेत. या डुकरांना कत्तलखान्यात पाठवून त्यांची कत्तल करण्यात आली आहे.

कोथरूड परिसरात मृत डुकरे आढळून येत असल्याने तिथे भरारी पथक नेमण्यात आले आहे. हे पथक सातत्याने त्या परिसरात पाहणी करीत आहे. डुकरांचा मृत्यू झाल्याने एखादा आजार पसरू नये, यासाठी तिथे कीटकनाशक फवारणी केली जात आहे.- डॉ. सारिका फुंडे, मुख्य पशुवैद्यकीय अधिकारी, महापालिका

कोथरूड परिसरातील डुकरांचा मृत्यू

तारीख – मृत डुकरे
६/०२/२०२५ – १६
७/०२/२०२५ – ०८
१०/०२/२०२५ – ०५
११/०२/२०२५ – ०२
१२/०२/२०२५ – ०२
१३/०२/२०२५ – ०१
१४/०२/२०२५ – ०६
१५/०२/२०२५ – ०९
१६/०२/२०२५ – ०३
१७/०२/२०२५ – ०२
एकूण मृत्यू – ५४