लोकसत्ता प्रतिनिधी
पुणे : खरेदीच्या बहाण्याने सराफी दुकानामध्ये आलेल्या दोन बुरखाधारी महिलांनी १ लाख ९० हजारांच्या दागिन्यांची चोरी केली. लष्कर भागातील सुभाष ज्वेलर्समध्ये १ जानेवारी रोजी सायंकाळी साडेपाच वाजण्याच्या सुमारास ही घटना घडली. या प्रकरणी लष्कर पोलीस ठाण्यात दोन महिलांविरुद्ध गुन्हा दाखल करण्यात आला आहे.
आणखी वाचा-संस्कृत शब्दकोशाच्या महाप्रकल्पाचे पुनरुज्जीवन, केंद्र सरकारकडून सहकार्य
पोलिसांनी दिलेल्या माहितीनुसार, बुरखा परिधान केलेल्या दोन महिला १ जानेवारी रोजी दागिने खरेदी करण्याच्या बहाण्याने सुभाष ज्वेलर्समध्ये गेल्या होत्या. त्यांनी दुकानातील कामगारांची नजर चुकवित दोन सोन्याच्या बांगड्या हातचलाखीने चोरून नेल्या. १ लाख ९० हजारांच्या बांगड्या चोरीला गेल्याचे लक्षात आल्यानंतर दुकानाच्या मालकाने पोलीस ठाण्यात तक्रार दाखल केली. पोलीस उपनिरीक्षक विजय बनसुडे तपास करीत आहेत.
