पुणे : शेअर मार्केटमध्ये पैसे गुंतविल्यास म्युच्युअल फंडपेक्षा अधिक मासिक आठ टक्के परतावा देण्याचे प्रलोभन दाखवत सेवानिवृत्त व्यवसायिकासह तिघांना नऊ कोटी ५० लाख ४४ हजार रुपयांचा गंडा घातल्याचा प्रकार उघडकीस आला आहे. दरम्यान, फसवणुकीचा आकडा पाहता हा तपास आर्थिक गुन्हे शाखेकडे वर्ग करण्यात आला असून पोलीस निरीक्षक संतोष खेतमाळस पुढील तपास करीत आहेत.याप्रकरणी नितीन वसंत डाके (वय ५७,रा. शुक्रवार पेठ नेहरु स्टेडियमसमोर) यांनी नांदेडसिटी पोलीस ठाण्यात फिर्याद दिली आहे. त्यानुसार पोलिसांनी राजेश रामगुलाब कुमार उर्फ राज कोटारीया, वंदना भीमराव शिरसाट (रा. डीएसके विश्व,धायरी) या दोघांविरुद्ध महाराष्ट्रातील ठेवीदाराचे हितसंरक्षण कायद्यानुसार गुन्हा दाखल करण्यात आला आहे. हा प्रकार ऑक्टोबर २०२२ ते ऑक्टोबर २०२३ या कालावधीत घडला आहे.
पोलिसांनी दिलेल्या माहितीनुसार, फिर्यादी डाके एका कंपनीत भागीदार आणि संचालक होते. सध्या ते सेवानिवृत्त आहेत. डाके यांचे एक शेजारी शेअर मार्केटच्या संदर्भात प्रशिक्षण वर्ग घेत होते. त्यांच्यामार्फत आरोपी कोटारीया याच्यासोबत डाके यांचा २०२१ मध्ये परिचय झाला होता. डाके यांनी कोटारीया याच्याकडे देखील शेअर मार्केटसंदर्भातील प्रशिक्षण घेतले. कोटारीया याने डाके यांना शेअर मार्केटमध्ये पैसे गुंतविल्यास म्युच्युअल फंडपेक्षा अधिक मासिक आठ टक्के परतावा देण्याचे प्रलोभन दाखवले. त्याच्यावर विश्वास ठेवून डाके यांनी वंदना शिरसाट हिच्या खात्यावर वेळोवेळी तब्बल २१ कोटी ५० लाख रुपये गुंतविले. कोटारीया याने त्यातील १३ कोटी ८ लाख ६० हजार रुपये डोके यांना परत केले.
डाके ऑक्टोबर २०२३ मध्ये डीएसके विश्वमधील कोटारीयाच्या कार्यालयामध्ये गेले. त्यावेळी त्याने ‘गुंतवणूक जाहिरातीच्या संदर्भात कोणीतरी माझ्या विरुद्ध तक्रार केली असून, सेबीकडून नोटीस आल्याने परतवा देण्याचे मी बंद केले आहे. तुमचे राहिलेले सर्व पैसे एप्रिल २०२४ पर्यंत एकरकमी देईल’, असे डाके यांना सांगितले. डाके कोटारीयाच्या संपर्कात होते. मात्र, काही दिवसानंतर त्याचा संपर्क बंद झाला. त्यामुळे डाके यांनी परत त्याचे कार्यालय गाठले. त्यावेळी सर्व चंबुगबाळं गुंडाळून कोटारीया फरार झाल्याचे त्यांना समजले. अशाच प्रकारे कोटारीया आणि त्याची साथीदार महिला या दोघांनी इतर दोन गुंतवणूकदारांचीही एक कोटी नऊ लाख चार हजार रुपयांची फसवणूक केली आहे. तर, डोके यांचे आठ कोटी ४१ लाख ४० हजार रुपये असे एकूण नऊ कोटी ५० लाख ४४ हजार रुपयांची फसवणूक केल्याचे फिर्यादीत म्हटले आहे.