पुणे : देशात तीन प्रकारच्या ऑनलाईन गेमिंगवर बंदी

पुणे : देशात अनेक जण ऑनलाईन गेमिंगच्या आहारी गेल्याची प्रकरणे समोर येत आहेत. या पार्श्वभूमीवर सरकारने तीन प्रकारच्या गेमवर बंदी घालण्याचा निर्णय घेतला आहे, अशी घोषणा केंद्रीय माहिती तंत्रज्ञान राज्यमंत्री राजीव चंद्रशेखर यांनी सोमवारी केली.जी-२० डिजिटल अर्थव्यवस्था कार्यगटाच्या तिसऱ्या परिषदेत माध्यमांशी बोलताना चंद्रशेखर यांनी ही माहिती दिली. ते म्हणाले, की सरकारने सर्वांशी सल्लामसलत करून नवीन आराखडा तयार केला आहे. विशिष्ट प्रकारच्या तीन प्रकारात मोडणाऱ्या गेमवर बंदी घातली जाणार आहे. यात सट्टा लावण्यात येणाऱ्या, वापरकर्त्यासाठी हानिकारक असलेल्या आणि व्यसन लागू शकेल अशा तीन प्रकारच्या गेमचा समावेश आहे.