पुणे : गेल्या महिनाभरापासून तेजीत असलेल्या टोमॅटोची आवक वाढल्याने घाऊक बाजारात टोमॅटोच्या दरात घट झाली. नवीन लागवड केलेला टोमॅटोची आवक बाजारात सुरू झाली असून, रविवारी श्री छत्रपती शिवाजी मार्केट यार्डातील घाऊक बाजारात नऊ हजार टोमॅटोच्या पेट्यांची आवक झाली. गेल्या आठवड्याच्या तुलनेत टोमॅटोची आवक दुपटीने वाढली आहे. घाऊक बाजारात दहा किलो टोमॅटोला प्रतवारीनुसार ३०० ते ५०० रुपये असे दर मिळाले आहेत.
गुलटेकडी येथील श्री छत्रपती शिवाजी मार्केट यार्डात रविवारी (१३ ऑगस्ट) राज्य, तसेच परराज्यांतून १०० ट्रक फळभाज्यांची आवक झाली. फळभाज्यांची आवक चांगली होत असून बहुतांश फळभाज्यांचे दर स्थिर असल्याची माहिती व्यापाऱ्यांनी दिली. कर्नाटकमधून मिळून १० टेम्पो हिरवी मिरची, गुजरात, कर्नाटकमधून मिळून ४ टेम्पो कोबी, आंध्रप्रदेश आणि तामिळनाडूतून ४ टेम्पो शेवगा, कर्नाटकातून ४ टेम्पो घेवडा, २ टेम्पो पावटा, गुजरातमधून २ टेम्पो भुईमूग शेंग, मध्य प्रदेश आणि गुजरातमधून मिळून १० टेम्पो लसूण, आग्रा, इंदूर, तसेच पुणे विभागातून मिळून ४० ट्रक बटाट्याची आवक झाली, अशी माहिती घाऊक बाजारातील प्रमुख अडते विलास भुजबळ यांनी दिली.
हेही वाचा – गोष्ट पुण्याची! भाग-९३: चिमाजी अप्पांच्या देखरेखीखाली साकारलेलं भव्य ओंकारेश्वर मंदिर
पुणे विभागातून सातारी आले ८०० गोणी, टोमॅटो नऊ हजार पेटी, फ्लाॅवर १० टेम्पो, कोबी ४ टेम्पो, पुरंदर, वाई, सातारा भागातून मटार ५ टेम्पो, भेंडी ७ टेम्पो, गवार ५ टेम्पो, भुईमूग शेंग, १०० गोणी, ढोबळी मिरची १० टेम्पो,काकडी १० टेम्पो, तांबडा भोपळा १० टेम्पाे, कांदा ७० ट्रक अशी आवक झाली.
