पुणे : महाशिवरात्रनिमित्त कसबा पेठेतील पुण्येश्वर मंदिर परिसरात आयोजित करण्यात आलेल्या कार्यक्रमानिमित्त बुधवारी (२६ फेब्रुवारी) सायंकाळी सहा ते रात्री बारापर्यंत पुण्येश्वर मंदिर आणि अगरवाल तालीम रस्ता वाहतुकीस बंद ठेवण्यात येणार आहे. या भागातून जाणारी वाहतूक पर्यायी मार्गाने वळविण्यात येणार आहे. वाहनचालकांनी पर्यायी मार्गाचा वापर करावा, असे आवाहन वाहतूक शाखेचे पोलीस उपायुक्त अमोल झेंडे यांनी केले आहे. महाशिवरात्रीनिमित्त पुण्येश्वर मंदिरात भाविकांची गर्दी होण्याची शक्यता आहे.
सायंकाळी सहानंतर मंदिर परिसरात विविध धार्मिक कार्यक्रमाचे आयोजन करण्यात आले आहे. कुंभारवेस चौकातून फडके हौद चौकाकडे जाणाऱ्या वाहनांनी गाडगीळ पुतळा चौक, जिजामाता चौकमार्गे फडके हौदाकडे जावे. सूर्य हाॅस्पिटलकडून अगरवाल तालीम रस्त्याने पवळे चौकाकडे जाणाऱ्या वाहनांनी जिजामाता चौक, गणेश रस्तामार्गे इच्छितस्थळी जावे. फडके हौद चौकातून कुंभारवेस चौकाकडे जाणाऱ्या वाहनचालकांनी गणेश रस्ता, फुटका बुरूज, गाडगीळ पुतळा चौकमार्गे कुंभारवेस चौकाकडे जावे. मंगळवार पेठेतील कमला नेहरू रूग्णालयाकडून सूर्य हाॅस्पिटलकडे जाणाऱ्या वाहनांनी दारुवाला पूलमार्गे फडके हौद, जिजामाता चौक, फुटका बुरूज, शनिवारवाडा, गाडगीळ चौकमार्गे इच्छित स्थळी जावे, असे आवाहन पोलीस उपायुक्त अमोल झेंडे यांनी केले आहे.
