पुणे : स्थानिक रहिवाशांच्या जीवितास धोका निर्माण करत दोघांनी सोसायटीतील अंतर्गत रस्त्यावर थार आणि स्कॉर्पिओ गाड्यांची रेस लावण्याचा प्रकार वाघोलीत घडला. त्याचा जाब विचारणाऱ्या सोसायटीतील रहिवाशांना चालकांनी दमदाटी केली. या घटनेचे चित्रीकरण समाज माध्यमावर प्रसारित झाल्यानंतर वाघोली वाहतूक विभागाने दोन्ही वाहनांवर कारवाई केली असून, त्यांच्यावर खटला दाखल करण्यात येणार आहे.
हा प्रकार वाघोली येथील एका सोसायटीत बुधवारी (९ एप्रिल) दुपारी अडीच ते तीनच्या सुमारास घडला होता. याप्रकरणी पोलिसांनी दोघांना ताब्यात घेतले. त्यांच्यावर वाहतूक नियमांचे उल्लंघन केल्याप्रकरणी कारवाई करण्यात आली असून, त्यांच्या गाड्या ताब्यात घेतल्याचे वाघोली पोलीस ठाण्याचे वरिष्ठ पोलीस निरीक्षक युवराज हांडे यांनी सांगितले. पोलिसांनी दिलेल्या माहितीनुसार, वाघोली येथील सोसायटीत दोघांनी बेकायदारीत्या प्रवेश केला. त्यानंतर सोसायटीच्या अंतर्गत रस्त्यावर थार आणि स्कॉर्पिओ गाडीची रेस केली.
हा प्रकार इमारतीच्या छतावरून एका व्यक्तीने मोबाइलमध्ये चित्रित केला आहे. त्यामध्ये दोन गाड्या एका ठिकाणी थांबून वेगात धावत आहेत. गाड्या पळवून झाल्यानंतर सोसायटीतील काही व्यक्तींनी थार गाडी चालविणाऱ्या तरुणाला थांबवून जाब विचारला. त्या वेळी त्याने उद्धट वर्तन करत अरेरावीची भाषा केली.
‘या ठिकाणी आमची मुले खेळतात’, असे सोसायटीतील व्यक्तीने निदर्शनास आणून दिले असता ‘कुठे खेळतात मुले? ही काय खेळायची जागा आहे का?’, असे गाडीतील तरुणाने म्हटल्याचे चित्रीकरण प्रसारित झाले आहे. या प्रकाराची माहिती मिळताच वाघोली पोलिसांनी दोघा तरुणांवर वाहतूक नियमांचे उल्लंघन केल्याची कारवाई करून दोन्ही गाड्या ताब्यात घेतल्या आहेत.