केंद्रीय गृह आणि सहकारमंत्री अमित शहा हे आज संध्याकाळी पुण्यात येणार आहेत. उद्या (रविवारी) पिंपरी-चिंचवड शहरामध्ये बहुराज्यीय सहकारी संस्थानासाठी तयार करण्यात आलेल्या वेब पोर्टलचे त्यांच्या हस्ते उद्घाटन होणार आहे. हा कार्यक्रम चिंचवडमधील रामकृष्ण मोरे प्रेक्षकगृहात होणार आहे. त्या अगोदर रामकृष्ण मोरे प्रेक्षकगृहाच्या परिसराला छावणीचे स्वरूप आले आहे. पोलिसांचा मोठा फौजफाटा बघायला मिळत आहे.
केंद्रीय गृह आणि सहकारमंत्री अमित शहा हे दोन दिवसांच्या पुणे दौऱ्यावर आहेत. आज संध्याकाळी ते पुण्यात येणार आहेत. उद्या (रविवारी) चिंचवडमधील रामकृष्ण प्रेक्षकगृहात त्यांच्या हस्ते बहुराज्यीय सहकारी संस्थानासाठी तयार करण्यात आलेल्या पोर्टलचे उद्घाटन होणार आहे. यासाठी पिंपरी-चिंचवड पोलिसांनीदेखील कंबर कसली असून गेल्या दोन ते तीन दिवसांपासून सुरक्षेच्या दृष्टिकोनातून पोलीस तयारी करत आहेत.
हेही वाचा – अकोलेकरांवर भर पावसाळ्यात जलसंकट; जलवाहिनीच्या दुरुस्तीमुळे…
केंद्रीय गृहमंत्री अमित शहा येणार असल्याने प्रेक्षकगृहाच्या परिसरात पोलिसांचा मोठा फौजफाटा तैनात करण्यात आला आहे. त्याचबरोबर अमित शहा थांबणार असलेल्या पुण्यातील पंचतारांकित हॉटेल ते चिंचवड येथील कार्यक्रमस्थळदरम्यान पोलिसांनी ताफ्याची रंगीत तालीम घेतली. चिंचवडमध्ये होणाऱ्या कार्यक्रमाला राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार हे उपस्थिती लावणार आहेत.
