खडकी बाजार परिसरातून दोन लाखांच्या बनावट नोटा जप्त करण्यात आल्या. या प्रकरणी एका पानपट्टी चालकासह तिघांना अटक करण्यात आली असून त्यांच्याकडून ५०० रुपयांच्या ४०० बनावट नोटा जप्त करण्यात आल्या आहेत. महसूल गुप्तचर संचालनालय (डीआरआय) आणि लष्कराच्या गुप्तचर विभागाने (एमआय) तिघांना अटक केली.
अतुलकुमार नरेशकुमार मिश्रा (वय २३ रा. शेवाळे टाॅवर्स, खडकी बाजार), रवी उर्फ सूरज वीरेंद्र शुक्ला (वय ३५, रा. नवा बाजार, खडकी), राजूलकुमार उर्फ गुड्डू भाई राजबहाद्दुर सेन (वय ४६, रा. लेक व्ह्यू सिटी, लोहगाव) अशी अटक करण्यात आलेल्यांची नावे आहेत. आरोपी अतुलकुमार मिश्रा याची खडकी बाजार परिसरात पानपट्टी आहे. आरोपी रवी शुक्ला अतुलचा ओळखीचा आहे. तो अतुल याच्या पानपट्टीत काम करत होता. शुक्ला याच्याकडे बनावट नोटा होत्या. दोन लाख रुपयांच्या बनावट नोटा वितरित केल्यास ३० हजार रुपये मिळतील, असे रवीने अतुलला सांगितले होते. त्यानुसार अतुल दोन लाख रुपयांच्या बनावट नोटा घेऊन खडकी बाजार परिसरातून निघाला होता. एलफिस्टन रोडवर तो येणार असल्याची माहिती महसूल गुप्तचर संचालनालयातील अधिकाऱ्यांना मिळाली. त्यानंतर याबाबतची माहिती लष्कराच्या गुप्तचर विभागाला देण्यात आली.
हेही वाचा- VIDEO : “वाचवा रे!…बसचालक त्रास देतोय, मदत करा, उतरू देत नाही” असं म्हणत प्रवाशाने ठोकली बोंब
एलफिस्टन रोडवर सापळा लावून अतुलला पकडण्यात आले. त्याच्याकडून ५०० रुपयांच्या ४०० बनावट नोटा जप्त करण्यात आल्या. त्यानंतर आरोपी रवीला ताब्यात घेण्यात आले. तेव्हा त्याने बनावट नोटा राजूलकुमारने दिल्याची माहिती अधिकाऱ्यांना दिली. राजूलकुमारला ताब्यात घेण्यात आले. बनावट नोटा वितरित करण्याचा प्रयत्न केल्या प्रकरणी तिघांना अटक करण्यात आली असून न्यायालायने त्यांना पोलीस कोठडीत ठेवण्याचे आदेश दिले. तपासात राजूलकुमारने बनावट नोटा कोलकात्यातून आणल्याचे माहिती मिळाली आहे. या प्रकरणाचा सखोल तपास सुरू आहे.
