पुणे : लोकसभा निवडणुकीच्या चौथ्या टप्प्यात राज्यातील काही मतदारसंघांचा समावेश आहे. त्यामुळे या मतदानावर अवकाळी पावसाचे गडद सावट निर्माण झाले आहे. सोमवारी (१३ मे) दुपारी तीननंतर पावसाचा जोर जास्त राहण्याचा अंदाज आहे. पुणे, नगर, जालना आणि छत्रपती संभाजीनगर जिल्ह्याला नारंगी आणि नंदुरबार, जळगाव आणि बीड जिल्ह्याला पिवळा इशारा दिला आहे.
हवामान विभागाने पुणे, नगर, जालना आणि छत्रपती संभाजीनगर जिल्ह्याला नारंगी इशारा दिला आहे. या जिल्ह्यात अवकाळीसह गारपीट होण्याची शक्यता आहे. नारंगी इशारा असलेल्या जिल्ह्यांत जालना, औरंगाबाद, मावळ, पुणे, शिरूर, नगर आणि शिर्डी लोकसभा मतदारसंघांचा समावेश आहे. नंदुरबार, जळगाव आणि बीड जिल्ह्याला पिवळा इशारा दिला असून, या जिल्ह्यांत नंदुरबार, जळगाव, रावेर, बीड लोकसभा मतदारसंघांचा समावेश आहे.
हवामान विभागाचे निवृत्त शास्त्रज्ञ डॉ. अनुपम कश्यपी म्हणाले, सकाळच्या सत्रात हवेत गारवा असेल, तापमानही कमी असेल त्यामुळे प्रामुख्याने ज्येष्ठ नागरिकांनी सकाळच्या सत्रात मतदान करण्याला प्राधान्य द्यावे. अन्य मतदारांनी दुपारपर्यंत मतदान उरकून घ्यावे. साडेतीननंतर मेघगर्जना आणि ताशी ४० ते ६० किलोमीटर प्रति तास वेगाने वारे वाहून पाऊस पडण्याचा अंदाज आहे. गारपीट होण्याचा इशारा देण्यात आला असला तरीही गारपीट होण्याची शक्यता कमी आहे.
‘ऑरेंज अलर्ट’ दिलेले जिल्हे
जालना, छत्रपती संभाजीनगर, पुणे, नगर
(लोकसभा मतदारसंघ – जालना, औरंगाबाद, मावळ, पुणे, शिरूर, नगर, शिर्डी )
हेही वाचा…मावळातील सरासरी मतदान ६० टक्केच, यंदा किती होणार मतदान?
‘यलो अलर्ट’ दिलेले जिल्हे
नंदुरबार, जळगाव, बीड
(लोकसभा मतदारसंघ – नंदुरबार, जळगाव, रावेर, बीड )
