पिंपरी: सेक्स पॉवर वाढवण्यासाठी आणि जिममध्ये अधिक जोमाने व्यायाम करण्यासाठी मेफेनटरमाइन सल्फेट इंजेक्शनचा कॉलेजमधील तरुणी आणि तरुण वापर करत असल्याचे पोलीस तपासात समोर आले आहे. रवी थापा या व्यक्तीला पिंपरी- चिंचवडच्या खंडणी विरोधी पथकाने अटक केली असून त्याच्याकडून ६०० ग्रॅम गांजा आणि मेफेनटरमाइन सल्फेट इंजेक्शनच्या ९५ बॉटल्स जप्त केल्या आहेत. या धक्कादायक प्रकारामुळे आपल्या पाल्यावर पालकांनी नजर ठेवण्याचे आवाहन पोलिसांनी केले आहे.
पिंपरीतील एका नामांकित महाविद्यालयाच्या परिसरात रवी थापाला पोलिसांनी गांजाच्या थैलीसह ताब्यात घेतलं होतं. त्याच्याकडून सहाशे ग्रॅम गांजा आणि मेफेनटरमाइन सल्फेट इंजेक्शनच्या ९५ बॉटल्स जप्त केल्या आहेत. आरोपीकडे पोलिसांनी चौकशी केल्यानंतर मेफेनटरमाइन सल्फेट इंजेक्शन हे सेक्स पॉवर वाढवण्यासाठी सर्रास वापर करत असल्याचं उजेडात आले आहे. तसेच सुदृढ शरीर दिसण्यासाठी तासनतास व्यायाम करणारे तरुण देखील हे इंजेक्शन घेत असल्याचं पुढं आले आहे. या इंजेक्शनमुळे सेक्स पॉवर तर व्यायाम करताना अधिक जोमाने आणि अधिक ताकतीने व्यायाम करत असल्याचं आरोपीने पोलिसांना सांगितला आहे, तसा दावा त्याने केला आहे. याप्रकरणी रवी थापाला पोलिसांनी अटक केली असून न्यायालयात हजर केला असता रवी थापाला दोन दिवसाची पोलीस कोठडी सुनावण्यात आली आहे.
आणखी वाचा- पुण्यानंतर आता पिंपरीत कोयता गॅंगची दहशत
कॉलेजमध्ये असलेल्या तरुण-तरुणीच्या आई-वडिलांना पोलिसांनी आवाहन केलं असून अशा व्यसनापासून आपल्या मुलांना दूर ठेवण्याचं आवाहन त्यांनी केले आहे. अशा प्रकारच्या व्यसनाचे पुढे चालून दूरगामी परिणाम होऊ शकतात असे देखील पोलिसांनी म्हटलं आहे. मेफेनटरमाइन सल्फेट इंजेक्शन हे ब्लड प्रेशर लो झालेल्या आणि प्रसुती वेदनासाठी (कळा) इंजेक्शन वापरलं जातं. परंतु, त्याचा अशा पद्धतीच्या व्यसनासाठी देखील वापर होत असल्याचं आता समोर आला आहे. ही कामगिरी खंडणी विरोधी पथकाचे पोलीस निरीक्षक अरविंद पवार यांच्या टीमने केली आहे.
