फ्लॉवर, कोबी, मटार, तोतापुरी कैरीच्या दरात घट

श्री छत्रपती शिवाजी मार्केट यार्डातील घाऊक बाजारात रविवारी राज्य, तसेच परराज्यातून मिळून १०० ट्रक फळभाज्यांची आवक झाली. कर्नाटक, गुजरात, आंध्र प्रदेशातून मिळून १४ ते १५ टेम्पो हिरवी मिरची, कर्नाटक, गुजरातमधून मिळून ५ ते ६ टेम्पो कोबी, कर्नाटकातून घेवडा आणि पावटा प्रत्येकी ४ ते ५ टेम्पो, १ टेम्पो भुईमूग शेंग, आंध्र प्रदेश, तमिळनाडूतून मिळून ५ ते ६ टेम्पो शेवगा, राजस्थानातून १० टेम्पो गाजर, तसेच ९ ते १० ट्रक मटार, गुजरात, मध्य प्रदेशातून १७ ते १८ टेम्पो लसूण अशी आवक परराज्यातून झाली, अशी माहिती मार्केट यार्डातील ज्येष्ठ अडते विलास भुजबळ यांनी दिली.

पुणे विभागातून सातारी आले ५०० ते ६०० गोणी, भेंडी ७ ते ८ टेम्पो, गवार ५ ते ६ टेम्पो, टोमॅटो १० हजार पेटी, हिरवी मिरची ४ ते ५ टेम्पो, ढोबळी मिरची १० ते १२ टेम्पो, काकडी ७ ते ८ टेम्पो, कोबी ७ ते ८ टेम्पो, फ्लाॅवर १० ते १२ टेम्पो, तांबडा भोपळा १४ ते १५ टेम्पो, कांदा १५० ते १६० ट्रक, तसेच इंदूर, आग्रा, स्थानिक भागातून ४० टेम्पो बटाट्याची आवक झाली.

मेथी, शेपू, कांदापात, राजगिऱ्याच्या दरात घट

मेथी, शेपू, कांदापात, राजगिरा, चुका, चवळई या पालेभाज्यांच्या दरात घट झाली. चाकवत, करडई, पुदिना, अंबाडी, मुळ्याचे दर स्थिर आहेत. तरकारी विभागात कोथिंबीर ९० हजार जुडी, मेथीच्या ६० हजार जुडींची आवक झाली., अशी माहिती तरकारी विभागातील व्यापाऱ्यांनी दिली. घाऊक बाजारात पालेभाज्यांचे शेकड्याचे दर पुढीलप्रमाणे – कोथिंबीर- ८०० ते १२००, मेथी -५०० ते ८००, शेपू – ५०० ते ७००, कांदापात- ४०० ते ८००, चाकवत – ३०० ते ६००, करडई- ४०० ते ६००, पुदिना – ३०० ते ५००, अंबाडी – ३०० ते ६००, मुळे – ४०० ते ८००, राजगिरा- ३०० ते ५००, चुका – ५०० ते ८००, चवळई- ३००-५००, पालक- ५००- १०००.

कलिंगड, खरबूजच्या दरात घट

उन्हाळ्यामुळे कलिंगड, खरबूजच्या मागणीत वाढ झाली. आवक मोठ्या प्रमाणावर झाल्याने कलिंगड, खरबूजच्या दरात घट झाली आहे. लिंबू, अननस, संत्री, मोसंबी, डाळिंब, चिकूचे दर स्थिर असल्याची माहिती व्यापाऱ्यांनी दिली. फळबाजारात रविवारी मोसंबी ३० ते ३५ टन, संत्री ७० ते ८० टन, डाळिंब १५ ते २० टन, पपई ८ ते १० टेम्पो, लिंबे दीड ते दोन हजार गोणी, कलिंगड ५० ते ६० टेम्पो, खरबूज ४० ते ५० टन, चिकू दोन हजार खोकी, अननस ६ ट्रक अशी आवक झाली.