पुणे : मराठा आरक्षणासाठी राज्यभरात सुरू असलेल्या आंदोलनाच्या पार्श्वभूमीवर शहरात सतर्कतेचे आदेश देण्यात आले असून लोकप्रतिनिधींच्या निवासस्थानांच्या परिसरात बंदोबस्त वाढवण्यात आला आहे.
मराठा आरक्षणाच्या मागणीसाठी पुकारलेल्या बंदला राज्यात काही ठिकाणी हिंसक वळण लागले. बीड, सोलापूर, यवतमाळ परिसरात लोकप्रतिनिधींच्या निवासस्थानांसमोर निदर्शने करण्यात आली. यापार्श्वभूमीवर शहरातील बंदोबस्तात वाढ करण्यात आली आहे. लोकप्रतिनिधींच्या निवासस्थानी आणि कार्यालयाच्या परिसरात बंदोबस्त ठेवण्यात आला आहे.
समाजमाध्यमातून प्रसारित केल्या जाणाऱ्या मजकुरांवर पोलिसांनी नजर ठेवली आहे. पुणे, पिंपरी चिंचवड शहर, तसेच ग्रामीण भागात बंदोबस्त वाढविण्यात आला आहे. शहर आणि जिल्ह्यातील संवेदनशील असलेल्या सुमारे २०० ठिकाणी पोलिसांनी नजर ठेवली आहे. समाजमाध्यमातून आक्षेपार्ह मजकूर प्रसारित करणाऱ्यांविरुद्ध कडक कारवाई करण्याचा इशारा पोलिसांनी दिला आहे.
