मुसळधार पावसामुळे ठिकठिकाणी पाणी; दोन ठिकाणी भिंत कोसळण्याच्या घटना

पुणे : मुसळधारांमुळे शहरातील वेगवेगळ्या भागात २५ ठिकाणी पाणी शिरण्याच्या घटना घडल्या. रविवारी सायंकाळी झालेल्या पावसामुळे दहा ठिकाणी झाडे पडली; तसेच दोन ठिकाणी भिंत कोसळण्याच्या घटना घडल्या. सुदैवाने या घटनेत जीवीतहानी झाली नाही. शहरात रविवारी (११ सप्टेंबर) सायंकाळी झालेल्या  पावसामुळे पाणी शिरण्याच्या घटना घडल्या. आंबीलओढा परिसरातील वसाहतीत पाणी शिरले. हडपसर, आंबीलओढा वसाहत, चंदननगर भागात मोठ्या प्रमाणावर पाणी साठले होते. चंदननगर पोलीस ठाणे तसेच जंगली महाराज रस्त्यावरील बालगंधर्व पोलीस चौकीत गुडघाभर पाणी साठले होते. मध्यरात्रीपर्यंत अग्निशमन दलाचे जवान मदतकार्य करत होते.