हडपसर, मगरपट्टा भागातील पाणीपुरवठा ‘ या ‘ दिवशी राहणार बंद, हे आहे कारण !

मागील आठवड्यात शहरातील विविध जलशुद्धीकरण केंद्रातील विद्युत विषयक कामे करण्यासाठी पालिकेने गुरुवारी पूर्ण दिवस संपूर्ण शहराचा पाणीपुरवठा बंद ठेवण्याचा निर्णय घेतला होता. ज्या दिवशी पाणी बंद होते त्याच्या दुसऱ्या दिवशी कमी दाबाने आणि उशीरा पाणी पुरवठा होईल, असे पाणी पुरवठा विभागाने सांगितले होते. मात्र कमी दाबाने तर सोडाच दुसऱ्या दिवशी उशीरा देखील अनेक भागातील पाणीपुरवठा सुरळीत झाला नव्हता.

हेही वाचा…विधानसभा निवडणुकीच्या तोंडावर तब्बल १२८ कोटींचे सोने जप्त, सहकारनगर भागात पोलिसांची कारवाई

सलग दोन दिवस पाणी न आल्याने पुणेकर नागरिक चांगलेच हवालदिल झाले होते. पाणी नक्की कधी येईल याची माहिती घेण्यासाठी बहुतांश नागरिकांनी पालिकेच्या पाणीपुरवठा विभागाकडे तक्रारी केल्या. आपल्या भागातील पाणी पुरवठा करणारे महापालिकेतील कर्मचारी आणि अधिकारी यांच्याशी संपर्क साधला, मात्र त्यांचे फोन उचलून त्यांना दिलासा देण्याचे साधे काम देखील महापालिकेतील कर्मचारी वर्ग करत नसल्याने नागरिकांमध्ये नाराजी पसरली आहे. पाणीपुरवठा विभागातील वरिष्ठ अधिकारी देखील याची दखल घेत नसल्याने नागरिक हवालदिल झाले आहेत.

गेल्या आठवड्यात शहरातील अनेक भागातील पाणी पुरवठा विस्कळीत झाल्याने नागरिकांना पाण्यासाठी त्रास सहन करावा लागला असताना आता महापालिकेच्या पाणीपुरवठा विभागाने पुन्हा एकदा संपूर्ण दिवस पाणी बंद ठेवण्याचा निर्णय घेतला आहे. उद्या (शनिवारी) २६ ऑक्टोबरला हा पाणी पुरवठा बंद ठेवला जाणार आहे.

हेही वाचा…उदंड जाहल्या ‘दिवाळी पहाट’

लष्कर पाणीपुरवठा जलकेंद्रातून रामटेकडीकडे जाणाऱ्या जलवाहिनीच्या दुरुस्तीचे काम महापालिकेच्या वतीने केले जाणार आहे. यासाठी शनिवारी हडपसर, मुंढवा, मगरपट्टा सिटी आणि आजूबाजूच्या परिसरातील पाणीपुरवठा बंद राहणार आहे. शनिवारी दिवसभर हा पाणीपुरवठा बंद राहणार असल्याने दुसऱ्या दिवशी रविवारी (२७ ऑक्टोबर) या भागात उशिरा आणि कमी दाबाने पाणीपुरवठा होणार आहे, असे लष्कर पाणीपुरवठा विभागाच्या वतीने कळविण्यात आले आहे.

पाणीपुरवठा बंद राहणारा भाग पुढीलप्रमाणे : संपूर्ण रामटेकडी, सय्यदनगर, हेवन पार्क, शंकर मठ, वैदुवाडी, संपूर्ण मुंढवा, मगरपट्टा, आकाशवाणी, साडेसतरानळी, केशवनगर, हडपसर गावठाण, सातववाडी, गोंधळे नगर, ससाणे नगर, काळेपडळ, शिंदे वस्ती, भीमनगर, मिलिंदनगर, भारत फोर्ज, महंमदवाडी गाव, राजीव गांधीनगर, एन.आय.बी.एम. रोड, पोकळेमळा, हांडेवाडी रोड परिसर.

हेही वाचा…पुणे : जिल्ह्यातील ३८ मतदान केंद्रे दुर्गम भागात, ‘मोबाइल नेटवर्क’ही मिळेना

महापालिका दर आठवड्याला दुरुस्तीच्या नावाखाली शहरातील पाणीपुरवठा बंद करत असल्याने त्याचा मोठा फटका नागरिकांना बसत आहे. आता सणाचे दिवस असतानाही पालिका प्रशासन पाणी बंद करण्याचा निर्णय जाहीर करते. एक दिवस पाणी बंद राहिले की त्याचे परिणाम पुढे दोन ते तीन दिवस नागरिकांना भोगावे लागतात. त्यानंतर आठ ते दहा दिवस गेले की पुन्हा महापालिका विद्युत पुरवठा दुरुस्ती, जलवाहिनी दुरुस्ती अशा नावाखाली पाणीपुरवठा बंद ठेवण्याचा निर्णय घेते, असा आरोप नागरिकांकडून केला जात आहे.