पुणे : मैत्रिणीबरोबर गप्पा मारत थांबलेल्या महिलेचा टेम्पोच्या धडकेत मृत्यू झाला. अपघातात दाम्पत्य जखमी झाल्याची घटना पुणे-सातारा रस्त्यावरील कात्रज भागात घडली. अपघातानंतर पसार झालेल्या टेम्पोचालकाविरुद्ध पोलिसांनी गुन्हा दाखल केला. दीपाली वैभव बर्गे असे मृत्युमुखी पडलेल्या महिलेचे नाव आहे. अपघातात पार्वती आदिनाथ वायदंडे (वय ५०, रा. साईराज बिल्डींग, मांगडेवाडी, कात्रज) आणि त्यांचे पती आदिनाथ जखमी झाले.
पार्वती यांनी याबाबत भारती विद्यापीठ पोलीस ठाण्यात फिर्याद दिली आहे. पोलिसांनी दिलेल्या माहितीनुसार, दीपाली, त्यांची मैत्रीण पार्वती, पती आदिनाथ शनिवारी रात्री आठच्या सुमारास कात्रज भागातील मांगडेवाडी परिसरात गप्पा मारत थांबले होते. त्यावेळी कात्रज घाटातून पुण्याकडे निघालेल्या भरधाव टेम्पोने रस्त्याच्या कडेला थांबलेल्या दीपाली यांना धडक दिली. पार्वती आणि त्यांचे पती आदिनाथ यांना धडक देऊन टेम्पोचालक घटनास्थळी न थांबता पसार झाला.
हेही वाचा – पुणे : बंडगार्डन रस्त्यावर तरुणाचा खुनाचा प्रयत्न, दोघांविरुद्ध गुन्हा
अपघातानंतर नागरिकांनी दीपाली, पार्वती आणि त्यांचे पती आदिनाथ यांना रुग्णालयात दाखल केले. उपचारादरम्यान दीपाली यांचा रुग्णालयात मृत्यू झाला. अपघाताची माहिती मिळताच वरिष्ठ पोलीस निरीक्षक शरद झिने यांनी घटनास्थळी भेट दिली. अपघातानंतर पसार झालेल्या टेम्पाेचालकाच शोध घेण्यात येत असून, पोलिसांनी कात्रज भागातील सीसीटीव्ही चित्रीकरण तपासले आहे. पोलीस उपनिरीक्षक शिंदे तपास करत आहेत.
