पुणे : औषध विक्रेत्याची फसवणूक केल्या प्रकरणी एकाच्या विरुद्ध गुन्हा दाखल करण्यात आला आहे. डाॅ. जोशी यांची पत्नी बोलत असल्याचे सांगून एका महिलेने औषध विक्रेत्याकडील दहा हजार रुपयांची रोकड लांबविल्याचा प्रकार उघडकीस आला आहे. या प्रकरणी सहकारनगर पोलिसांनी गुन्हा दाखल केला आहे. दोन दिवसांपूर्वी नगर रस्त्यावर एका महिलेने डॉक्टर कुलकर्णी असल्याचे सांगून सराफी पेढीतील व्यवस्थापकास दोन लाख रुपयांचा गंडा घातला होता.
याबाबत मुकेश वालचंद जैन (रा. लेकटाऊन सोसायटी, बिबवेवाडी) यांनी सहकारनगर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, बिबवेवाडी येथील लेक टाऊन येथे जैन यांचे एम जे. सर्जीकल मेडीकल असून त्यांच्या मोबाइल क्रमांकावर एका महिलने संपर्क साधला. डाॅ. जोशी यांची पत्नी बोलत असल्याचे महिलेने सांगितले. कंबरेचा पट्टा आणि वाॅकर सातारा रस्त्यावरील रुग्णालयात पाठवून द्या. माझ्याकडे दोन हजार रुपयांच्या नोटा आहे. त्याबदल्यात तुम्ही मला पाचशे रुपयांच्या नोटा द्या, असे महिलेने सांगितले. त्यानंतर जैन यांनी कामगार रवींद्रकुमार याला कंबरपट्टा, वाॅकर आणि दहा हजार रुपये घेऊन रुग्णालयाच्या परिसरात पाठविले. त्यानंतर रुग्णालयाच्या परिसरात एकजण रवींद्रकुमार यांना भेटला. डाॅ. जोशी यांच्या पत्नीने मला पाठविले आहे. तुमच्याकडील दहा हजार रुपयांची रोकड मला द्या. मी मॅडमकडून पैसे घेऊन येतो, असे सांगून त्याने रवींद्रकुमार याच्याकडून दहा हजार रुपये घेतले.
हेही वाचा – जयंत पाटलांना लग्नाच्या वाढदिवशी ईडीची नोटीस, अजित पवार म्हणाले, “माझा आणि त्यांचा…”
बराच वेळ झाला तरी पैसे घेऊन गेलेला आरोपी परत आला नाही. तेव्हा रवींद्रकुमार रुग्णालयात गेला. तेव्हा पैसे घेऊन गेलेली व्यक्ती पसार झाल्याचे उघडकीस आले.
