“कष्टकऱ्यांनी संघर्ष करून बांधकाम मजुरांसाठी कायदा करणे सरकारला भाग पाडले. मात्र, या कायद्यात बांधकाम मजुरांच्या नावाखाली कोट्यवधींचा भ्रष्टाचार सुरू आहे,” असा गंभीर आरोप कष्टकरी कामगार पंचायतीचे अध्यक्ष बाबा कांबळे यांनी केला आहे. कामगारमंत्री हसन मुश्रीफ यांना कामगारांचे प्रश्न, तक्रारी ऐकण्यासाठी वेळ नाही, अशी तक्रारही कांबळे यांनी केली. ते पिंपरी चिंचवडमधील वाकड भुमकर चौकात आयोजित असंघटित कामगार मेळाव्यात बोलत होते.
बाबा कांबळे म्हणाले, “असंघटित कामगारांमध्ये बांधकाम मजुरांची संख्या मोठी आहे. २००७ मध्ये आम्ही संघर्ष करून बांधकाम मजुरांसाठी कायदा करण्यास सरकारला भाग पाडले. सध्या या कायद्याचा गैरवापर सुरू आहे.”
“कामगारमंत्री हसन मुश्रीफ यांना तक्रारी ऐकण्यासाठी वेळच नाही”
“दररोज बांधकाम मजुरांचे अपघात होत आहेत. मालक, बांधकाम व्यावसायिकांना मोकळे सोडले जाते. छोट्या ठेकेदारांवर गुन्हे दाखल केले जातात. प्रत्येक बांधकाम प्रकल्पावर मजुरांवर अन्याय होत असल्याच्या तक्रारी आहेत. मात्र, त्याकडे कोणाचे लक्ष नाही. कामगारमंत्री हसन मुश्रीफ यांना देखील तक्रारी ऐकण्यासाठी वेळच नाही,” असा आरोप बाबा कांबळे यांनी केला.
हेही वाचा : …तर किरीट सोमय्या यांची हत्तीवरून मिरवणूक काढू : हसन मुश्रीफ
यावेळी राजू साव, मुकेश ठाकूर, दिनेश यादव, महेंद्र जाधव, शिवाजी गोरे, मधुरा डांगे, सुषमा बाळसराफ आदी उपस्थित होते.
