लोकसत्ता प्रतिनिधी
पुणे : भरधाव दुचाकी घसरुन सहप्रवासी तरुणीचा मृत्यू झाल्याची घटना वारजे भागात घडली. अपघातास जबाबदार ठरलेल्या दुचाकीस्वार तरुणाविरुद्ध वारजे पोलिसांनी गुन्हा दाखल केला.
गौरी संजीवकुमार कलशेट्टी (वय २० रा. शिवाजी चौक, आंबेगाव) असे मृत्युमुखी पडलेल्या तरूणीचे नाव आहे. याप्रकरणी दुचाकीस्वार अभिषेक गणेश बानगुडे (वय २४ रा. नऱ्हे) याच्याविरुद्ध गुन्हा दाखल करण्यात आला. याबाबत रोहित कलशेट्टी (वय ४०) यांनी वारजे पोलीस ठाण्यात फिर्याद दिली आहे.
आणखी वाचा-अत्याचारामुळे मुलाची आत्महत्या, सहकारनगर पोलिसांकडून एकास अटक
पोलिसांनी दिलेल्या माहितीनुसार, रोहित यांची बहीण गौरी आणि अभिषेक हे रविवारी (२४ नोव्हेंबर) दुपारी अडीचच्या सुमारास मुळशीतील एका मंदिरात दर्शनासाठी निघाले होते. बाह्यवळण मार्गावर वारजे माळवाडी परिसरातील माई मंगेशकर रुग्णालयासमोर भरधाव वेगात मोटार आली. दुचाकीस्वार अभिषेकने ब्रेक दाबला. दुचाकी घसरुन सहप्रवासी गौरी पडली. तिच्या डोक्याला गंभीर दुखापत झाली. तिला रुग्णालयात दाखल करण्यात आले. उपचारांपूर्वीच तिचा मृत्यू झाल्याचे डॉक्टरांनी सांगितले. पोलीस उपनिरीक्षक नरळे तपास करत आहेत.
