लोकसत्ता प्रतिनिधी
पुणे: सिंहगड रस्त्यावर खडकवासला धरण चौपाटी परिसरात भरधाव मोटारीने दुचाकीला धडक दिल्याने दुचाकीस्वार तरुणाचा मृत्यू झाल्याची घटना घडली. अपघातात सहप्रवासी तरुण गंभीर जखमी झाला असून त्याच्यावर खासगी रुग्णालयात उपचार सुरू आहेत.
नितीन भाऊसाहेब मुसमाडे (वय ३२, रा. नऱ्हे ) असे मृत्युमुखी पडलेल्या दुचाकीस्वाराचे नाव आहे. अपघातात सहप्रवासी राम गणपत राठोड (वय २७, रा. प्रतापगड हाॅस्टेल, नऱ्हे) गंभीर जखमी झाला आहे. त्याच्यावर खासगी रुग्णालयात उपचार सुरू आहेत. दुचाकीस्वार मुसमाडे आणि राठोड पहाटे अडीचच्या सुमारास डोणजे परिसरातून पुण्याकडे निघाले होते. त्या वेळी भरधाव मोटारीने दुचाकीला धडक दिली.
आणखी वाचा-पुणे: पादचाऱ्यांचे मोबाइल हिसकावणारे चोरटे गजाआड
अपघातानंतर मोटारचालक डोणजे गावाकडे पसार झाला. रात्र गस्तीवर असणारे पोलीस उपनिरीक्षक डी. पी. शिंदे, महेंद्र चौधरी यांना अपघाताची माहिती मिळताच ते घटनास्थळी दाखल झाले. अपघातात दुचाकीस्वार मुसमाडे याचा जागीच मृत्यू झाला होता. या प्रकरणी हवेली पोलीस ठाण्यात मोटारचालकाच्या विरुद्ध गुन्हा दाखल करण्यात आला आहे. पसार झालेल्या मोटारचालकाचा शोध घेण्यात येत आहे.
