पुणे : सध्या नवरात्रोत्सव सुरू आहे. दांडिया, गरबा खेळण्यात तरुण तरुणी मग्न आहेत. गरबा खेळत असताना तरुणाचा हृदय विकाराच्या झटक्याने मृत्यू झाल्याची घटना पुण्याच्या चाकणमधून समोर आली आहे. घटनेचा व्हिडिओ समोर आला आहे. अशोक माळी असं मृत्यू झालेल्या तरुणाचं नाव असल्याचं सांगण्यात येत आहे. त्यांचं नृत्य शेकडो तरुण आणि तरुणी पाहात होते. अनेक जण त्यांचा गरबा मोबाईलमध्ये कैद करत होते.
मृत्यू कोणाला कधी गाठेल याचा भरोसा नाही. अशीच घटना पुण्याच्या चाकणमध्ये घडली आहे. लहान मुलीसह गरबा खेळत असलेल्या अशोक माळी यांना अचानक भोवळ आली आणि ते गुडघ्यावर खाली बसले. त्यांचा हृदयविकाराच्या झटक्याने मृत्यू झाल्याचं सांगितलं जात आहे. अशोक माळी लहान मुलीसह गरबा खेळत होते. तरुण आणि तरुणी त्यांचा हा गरबा आपल्या मोबाईलमध्ये कैद करत होते. “घूंघट में चाँद होगा आँचल में चाँदनी” या गाण्यावर त्यांचं गरबा नृत्य सुरू होतं.
काही मिनिटं गरबा खेळून झाल्यानंतर अशोक माळी अस्वस्थ वाटल्याने त्यांची गरबा खेळण्याची गती कमी झाली आणि ते भोवळ येऊन कोसळले. त्यांना हृदयविकाराचा झटका आल्याने त्यांचा मृत्यू झाल्याचं सांगितलं जात आहे. काही सेकंदात होत्याचं नव्हतं झालं. गेल्या काही वर्षांपासून लहानांपासून मोठ्यांपर्यंत हृदयविकाराच्या झटक्याने अनेकांचा मृत्यू झाला आहे. बदलत चाललेली जीवनशैली आणि व्यायामाचा अभाव अशा काही गोष्टींमुळे हृदयविकाराचे झटके येत असल्याचं वारंवार तज्ज्ञ डॉक्टरांनी म्हटलेलं आहे.
