लोकसत्ता प्रतिनिधी
पुणे : मैत्रिणीच्या समाजमाध्यमातील खात्यावर संदेश पाठविल्याने जाब विचारणाऱ्या तरुणावर टोळक्याने तीक्ष्ण शस्त्राने वार केल्याची घटना हडपसर भागात घडली. खुनाचा प्रयत्न केल्याप्रकरणी पोलिसांनी आरोपींविरुद्ध गुन्हा दाखल केला आहे.
अमर बसवराज जमादार (वय २०, रा. गोपाळपट्टी, मांजरी), अमन अशोक नरोटे (वय १९, रा. अष्टविनायक कॉलनी, काळेपडळ, हडपसर), श्रीपती संतोष सरोदे (वय १९, रा. साडेसतरानळी, हडपसर) अशी गुन्हा दाखल करण्यात आलेल्यांची नावे आहेत. अमोल राजाराम घाटे (वय २५, रा. माळवाडी, हडपसर, मूळ रा. नांदेड) असे जखमी झालेल्याचे नाव आहे. याबाबत घाटे याने हडपसर पोलीस ठाण्यात फिर्याद दिली आहे.
आणखी वाचा-रिंग रोडच्या पूर्व मार्गासाठी भूसंपादनाला अडथळा…खेड तालुक्यातील १२ गावांमधील जमिनींबाबत पेच
आरोपींनी घाटे याच्या मैत्रिणीला संदेश पाठविला होता. घाटे आणि त्याचा मावस भाऊ सुदर्शन दासवड जेवण करुन रात्री निघाले होते. हडपसर भागातील माळवाडी परिसरात आरोपी जमादार, सरोदे, नरोटे आणि साथीदार थांबले होते. मैत्रिणीच्या मोबाइलवर संदेश का पाठविला, अशी विचारणा घाटेने आरोपींकडे केली. त्यानंतर आरोपींनी घाटेला शिवीगाळ करुन त्याच्यावर तीक्ष्ण शस्त्राने वार केले. भांडणात मध्यस्थी करणाऱ्या दासवड याच्यावर वार करुन आरोपी पसार झाले. पसार झालेल्या दोघांना पोलिसांनी पकडले असून, साथीदारांचा शोध धेण्यात येत आहे.
