लोणावळा : लोणावळा शहरात खासगी बंगल्यातील जलतरण तलावात बुडून पर्यटकांचा मृत्यू होण्याच्या घटना वाढीस लागल्या आहेत. खंडाळा भागातील एका बंगल्यातील जलतरण तलावात बुडून युवकाचा मृत्यू झाल्याची घटना उघडकीस आली आहे.
निखिल संपत निकम (वय २२, रा. चिंचवड) असे मृत्युमुखी पडलेल्या युवकाचे नाव आहे. या प्रकरणी लोणावळा शहर पोलीस ठाण्यात अकस्मात मृत्यू अशी नोंद करण्यात आली आहे. लोणावळ्यात मंगळवारी (३ जानेवारी) निखिल आणि त्याचे मित्र वाढदिवस साजरा करण्यासाठी आले होते. निखिलच्या मित्राचा मंगळवारी वाढदिवस होता. त्यांनी खंडाळा भागातील एक बंगला भाडेतत्वावर घेतला होता. मंगळवारी रात्री निखिल बंगल्यातील जलतरण तलावात उतरला. पोहताना ताे बुडाला. निखिल बुडाल्याचे लक्षात आल्यानंतर मित्रांनी त्याला खासगी रुग्णालयात दाखल केले. उपचारांपूर्वीच त्याचा मृत्यू झाला होता. या घटनेची माहिती मिळताच पोलीस निरीक्षक सीताराम डुबल, उपनिरीक्षक मुजावर यांनी घटनास्थळी भेट दिली. घटनास्थळाची पाहणी पोलिसांनी केली असून या प्रकरणी तपास करण्यात येत आहे.
नववर्षाच्या स्वागतासाठी लोणावळा, खंडाळा परिसरात मोठ्या संख्येने पर्यटक येतात. लोणावळ्यातील जलतरण तलावात बुडून दोन बालकांचा मृत्यू झाल्याची घटना दोन महिन्यांपूर्वी घडली होती. जलतरण तलावातील दुर्घटना रोखण्यासाठी पोलिसांनी बंगले मालकांची बैठक आयोजित केली होती. या बैठकीत लोणावळा, खंडाळा परिसरातील १०० बंगले मालक सहभागी झाले होते. पोलिसांनी दुर्घटना रोखण्यासाठी सूचना दिल्या होत्या.
