शेफ नीलेश लिमये
सॉम- टॉम सॅलड हे मूळचं थाई सॅलड आहे. बँकॉकमध्ये कुठेही फिरलात तर तुम्हाला हे सॅलड प्रत्येक रेस्टॉरंटमध्ये किंवा रस्त्यावरच्या लहान स्टॉल्समध्येही मिळेल. तिथे यासोबत एक फिश सॉस त्यामध्ये घालतात आणि या सॅलडची चव अप्रतिम लागते. आपणही अशा प्रकारे करू शकतो. त्यासाठी व्हिनेगर आणि सोया सॉसच्या मिश्रणात रात्रभर सुकट भिजवून ते वापरू शकता. शाकाहारी असाल तर चिंचेची चटणी वापरता येते. मीही तीच वापरली आहे.
साहित्य
* १ छोटय़ा आकाराची कच्ची पपई
ड्रेसिंगसाठी – १ टोमॅटो, कोथिंबीर, पुदिना, बेसिल, १ चमचा शेंगदाणे, १ चमचा तांदूळ, १ चमचा सोया सॉस, १ चमचा चिंचेची चटणी, १ चमचा चिली सॉस, मीठ आणि मिरपूड
कृती :
कच्ची पपई सोलून त्याच्या बारीक चकत्या करून घ्या. त्याचेही लांबट पातळ काप काढा. पाण्यात भिजवून फ्रिजमध्ये ठेवा.
आता ड्रेसिंगच्या तयारीला लागू. एका वाटीत टोमॅटो कापून ठेवा. त्यात चिंचेची चटणी, सोया सॉस, चिली सॉस, मीठ, मिरपूड, साखर घाला आणि हे मिश्रण ठेचून एकजीव करा. हे झालं ड्रेसिंग तयार. आता यामध्ये चिरलेली पपई एकत्र करा. आणि बाउलमध्ये पेश करा.
सजावटीसाठी – तांदूळ मंद आचेवर भाजून घ्या. हे अगदी छान भाजले गेले पाहिजेत तरच ते कुरकुरीत लागतात. हे तांदूळ त्या सॅलडवर शिंपडून घ्या. तसंच त्यावर शेंगदाणे भरडून वरून घाला. पुदिना, कोथिंबीर आणि बेसिल सॅलडवर पेरा. हे आगळ्यावेगळ्या प्रकारचं सॅलड तयार झालं.
