चायनीज पदार्थांना देशी तडका देत हल्ली अनेकजण वेगवेगळे पदार्थ ट्राय करुन पाहतात. यातील नूडल्स हा चायनीज पदार्थ अनेकांच्या आवडीचा आहे. लहानांपासून मोठ्यांपर्यंत नूडल्स आवडीने खातात. पण हे नूडल्स मैद्याच्या पीठापासून बनवत असल्याने मधुमेहाच्या रुग्णांसाठी ते अपायकारक ठरतात. अशावेळी तुम्ही मैदा, गव्हाचं पीठ न वापरता घरच्या घरी ज्वारीच्या पीठापासून चक्क चटपटीत नूडल्स बनवू शकता. हे नूडल्स मधुमेहाच्या रुग्णांसाठी तर फायदेशीर आहेच शिवाय लहान मुलांसाठीही पौष्टीक आहेत. यासाठी लोकसत्ता पूर्णब्रह्म अंकातून आम्ही तुम्हाला ज्वारीचे नूडल्स कसे बनवायचे याची रेसिपी घेऊन आले आहोत. ज्वारीचे नूडल्स बनवण्याचे साहित्य १ वाटी ज्वारीचे पीठ, १ वाटी बारीक चिरलेला कोबी, १ वाटी बारीक चिरलेला पातीचा कांदा, १ वाटी बारीक गाजर, १ वाटी भोपळी मिरचीचे काप, ८- १० लसूण पाकळ्या, १ चमचा बारीक कापलेले आले, १ चमचा सोयासॉस, १ चमचा टोमॅटो सॉस, १ चमचा चिली सॉस, अर्धा चमचा मिरपूड, १ चमचा तेल, मीठ, पाणी. ज्वारीचे नूडल्स बनवण्याची कृती ज्वारीच्या नूडल्स करण्यासाठी प्रथम वाटीभर पाणी उकळत ठेवावे. त्यात ज्वारीचे पीठ व चवीपुरते मीठ घालून त्याची उकड काढावी. उकडीपासून चाळणीवर नूडल्स काढाव्या. पॅनमध्ये तेल गरम करून त्यात क्रमाने आले, लसूण, कांदा, गाजर, भोपळी मिरची हे सर्व घालून परतून घ्यावे. त्यावर सर्व प्रकारचे सॉस घालावेत. चवीसाठी मीठ व मिरपूड घालणे. त्यात वाफवलेल्या नूडल्स घालून हलक्या हाताने मिक्स कराव्यात. अशाप्रकारे ज्वारीच्या नूडल्स आस्वादासाठी तयार. मैद्याच्या पिठापासून बनवलेले नूडल्स नियमित खाणे हानिकारक ठरू शकते, अशावेळी तुम्ही ज्वारीच्या पीठापासून बनवलेले नूडल्स खाऊन निरोगी राहू शकता. यात वाढत्या मधुमेह आजाराने ग्रस्त रुग्णांसाठी हे नूडल्स खूप पौष्टीक ठरू शकतात.
