आपण रोज काही ना काही वेगवेगळ्या प्रकारच्या भाज्या बनवतो. त्यामध्ये वांग्याची भाजी, शिमला मिरची, भेंडी, दोडका, पालक बनवतो. पण त्याच त्या भाज्या खाऊन आपण कंटाळतो पण ह्याच भाज्यांमध्ये आपण मसाले भरले तर किती चटपटीत भाज्या बनतील. अशीच एक चटपटीत भाजी आज आपण पाहणार आहोत आणि ती म्हणजे शिमला मिरचीची. शिमला मिरची सारख्या कंटाळवाण्या भाजीमध्ये आपण जर मसाले भरले तर ती भाजी सुद्धा चटपटीत बनेल. तर आपण आज पाहणार आहोत चटपटीत अशी भरलेली शिमला मिरचीची भाजी. या भाजीमध्ये आपण आपल्या घरामध्येच असलेले मसाले वापरणार आहोत आणि खूप कमी वेळात ही चटपटीत भाजी तयार होते. चला तर मग पाहुयात सोपी रेसिपी
भरलेली ढोबळी मिरची साहित्य
- शिमला मिरची – पाव किलो
- तेल – १ वाटी
- जिरं – १/२ चमचा
- हिंग – १/४ चमचा
- आलं लसूण पेस्ट – २ चमचे
- कांदा – १ मोठा
- टोमॅटो – १
- हळद – १/२ चमचा
- मिरची पावडर – १ १/२ चमचा
- गरम मसाला पावडर – १ चमचा
- धने पूड – १ चमचा
- बेसन – १/२ वाटी
- उकडलेले बटाटे – २
- मीठ – चवीपुरते
- आमचूर पावडर – १/२ चमचा
- बारीक चिरलेली कोथिंबीर – १/२ वाटी
भरलेली ढोबळी मिरची कृती
१. प्रथम शिमला मिरची धुवून घ्या. नंतर मिरचीचे दोन भाग करा देठ तशीच ठेवायची आणि बी काढून टाका.
२. आता आपण सारण करून घेऊ. सारणासाठी प्रथम एक कढई घ्या आणि त्यात ४ चमचे तेल घाला. तेल चांगल तापलं की त्यात १/२ चमचा जिरे, १/४ चमचा हिंग घाला.
३. नंतर गॅस कमी करून त्यात आलं लसणाची पेस्ट घाला. छान परतून घ्या नंतर त्यात एक मोठा कांदा बारीक चिरून घाला. व छान हलका तांबूस रंग येईपर्यंत परतवून घ्या.
४. नंतर त्यात १ टोमॅटो बारीक चिरून टाका. त्यातील बी काढून टाका व छान परतून घ्या. आता त्यात १/२ चमचा हळद घाला. १ १/२ चमचा लाल मिरची पावडर घाला.
५. नंतर त्यात १ चमचा गरम मसाला पावडर, १ चमचा धने पूड व १/२ वाटी बेसन घाला व छान एकत्र करून घ्या.
६. आता २ ते ३ मिनिटे हे सर्व मसाले छान परतून घ्या. नंतर त्यात उकडून आणि किसून घेतलेले २ बटाटे घाला.
७. नंतर त्यात चवीपुरते मीठ, १/२ चमचा आमचूर पावडर व थोडीशी बारीक चिरलेली कोथिंबीर घाला व गॅस कमीच ठेवून २ मिनिटे परतून घ्या व सर्व साहित्य एकजीव करा. आता आपलं सारण तयार झालं.
हेही वाचा >> झटपट करा चमचमीत टोमॅटो शेव भाजी; चवीला बेस्ट- करायला सोपे, नोट करा सोपी रेसिपी
८. आता सारण थंड झाल्यावर आपण चिरलेल्या शिमला मिरची मध्ये भरून घ्या.
९. आता एक पसरट पॅन किंवा तवा घ्या. त्यात २ मोठे चमचे तेल घाला. तेल चांगले तापले की त्यात आपण भरलेले शिमला मिरची घाला व छान दोन मिनिटे होऊ द्या.
१०. नंतर मिरची दुसऱ्या बाजूने उलटी करून त्यावर झाकण ठेवा. व दोन मिनिटे छान होऊ द्या.
११. ही शिमला मिरची ७ ते ८ मिनिटे अशीच उलट पलट करून शिजवून घ्यायची. म्हणजे दर दोन मिनिटाला उलटत राहायची. व झाकण ठेवून शिजू द्यायची.
हेही वाचा >>
१२. तर तयार आहे आपली खमंग आणि कुरकुरीत शिमला मिरची. तर तुम्ही सुद्धा ही भरवा मिरची बनवून बघा व कशी झाली ते आम्हाला नक्की सांगा.
