भारतीय परंपरेतील कला-वैविध्य, उत्सवप्रियता, सामाजिक- सांस्कृतिक जिवंतपणा बव्हंशी रंगातूनच अभिव्यक्त होत असतो. रंगांचा देश म्हणूनच जगात भारताची ओळख आहे. भारतीय संस्कृतीतील रंगांचा वापर हा केवळ सजावटीसाठी नव्हे, तर धार्मिक, राजकीय प्रतीक म्हणून आजही होताना दिसतो. या रंगनिर्मिती उद्योगात पहिली भारतीय कंपनी एशियन पेंट्सला मात्र त्या काळी सात ब्रिटिश कंपन्यांशी स्पर्धा करूनच स्थान निर्माण करता आले. १९४२ साली स्थापित एशियन पेंट्सने काही दशकांपूर्वी केवळ आत्मनिर्भर वाटचाल सुरू केली इतकेच नाही तर ती जगातील १८ देशांच्या बाजारपेठांत दमदार स्थान कमावणारी सर्वात मोठी भारतीय बहुराष्ट्रीय रंग निर्माता कंपनीही बनली. हे शक्य झाले रंग उद्योगाचे अग्रदूत म्हणून लौकिक कमावणाऱ्या अश्विन सूर्यकांत दाणी यांच्या कामगिरी आणि कर्तबगारीने. या कंपनीत तब्बल साडेपाच दशके कारकीर्द राहिलेले तिचे माजी अध्यक्ष दाणी यांनी वयाच्या ८१ व्या वर्षी या जगाचा गुरुवारी निरोप घेतला.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
