पश्चिम महाराष्ट्रातील कोल्हापूर, सांगलीमध्ये पूरपरिस्थिती ही अलीकडे दर पावसाळ्यातील नित्याची बाब ठरू लागली आहे. यंदाही कोल्हापूरमध्ये पंचगंगेने धोक्याची पातळी ओलांडली होती. सांगलीतही जवळपास दोन आठवडे पूरपरिस्थिती कायम होती. १०० पेक्षा जास्त गावांना पुराचा फटका बसला. कोल्हापूर, सांगलीमध्ये पूरपरिस्थिती निर्माण झाल्यावर नेहमीप्रमाणे कर्नाटकातील अलमट्टी धरणातील पाण्याच्या विसर्गावर महाराष्ट्रातील राज्यकर्ते व स्थानिक राजकारणी खापर फोडून मोकळे होतात. यातूनच अलमट्टी धरणाची उंची वाढविण्यास महाराष्ट्राने नेहमीच विरोध केला आहे. महाराष्ट्र-कर्नाटक सीमा प्रश्न असो वा कावेरी पाणीवाटपावरून कर्नाटक-तमिळनाडूतील वाद, हे प्रश्न वर्षानुवर्षे कायम आहेत. तसेच अलमट्टी धरणावरून महाराष्ट्र आणि कर्नाटकमधील वादही असाच चिघळत गेला. अलमट्टीची पुन्हा नव्याने चर्चा सुरू होण्याचे कारण म्हणजे, कर्नाटकचे मुख्यमंत्री सिद्धरामय्या यांनी अलमट्टी धरणाची उंची वाढविण्यासाठी केंद्र सरकारने परवानगी द्यावी, अशी नव्याने मागणी केली आहे. अलमट्टी येथे कृष्णा नदीत जलपूजनाच्या कार्यक्रमात सिद्धरामय्या यांनी कर्नाटकच्या हितासाठी कृष्णा पाणी लवादाच्या निर्णयानुसार अलमट्टीची उंची ५२४.२५ मीटरपर्यंत वाढविण्यास मंजुरी मिळावी ही भूमिका मांडली. कृष्णा नदी लवादाने १३० अब्ज घनफूट अतिरिक्त पाण्याचा वापर करण्यास कर्नाटक सरकारला परवानगी दिली असून, या वापरासाठी अलमट्टी धरणाची उंची वाढविण्यास परवानगी मिळावी, अशी सिद्धरामय्या यांची भूमिका आहे. या धरणाची उंची हा महाराष्ट्राच्या दृष्टीने अत्यंत संवेदनशील विषय असल्याने राज्यातून कर्नाटकच्या मागणीस विरोध स्वाभाविक आहे. धरणाची उंची ५१९ मीटर असली तरी ५१७ मीटरपर्यंतच कर्नाटकने पाण्याचा साठा करावा, अशी राज्यातून मागणी झाली होती.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
