लोक काहीही म्हणोत हो! तुम्ही अजिबात लक्ष देऊ नका दादा. गुलाबी रंगाचा वसा घेतला म्हणजे घेतला. आता मुख्यमंत्र्यांची खुर्ची मिळेपर्यंत स्वस्थ बसायचे नाही. सध्या रिकामटेकड्यांची संख्या भरपूर झालेली. ते या काहीबाही बोलत असतात. जसे की, तुमच्यासमोर गुलाबी वेष्टणातली फाइल आली की तुम्ही लवकर क्लीअर करता. तुम्हाला गुलाबी पेन आवडू लागलाय. तहान भागवण्यासाठी गुलाबपाणीच लागते. सर्व साहाय्यकांनी ‘गुलाबी आँखे जो तेरी देखी’ या गाण्याची रिंगटोन ठेवलीय. हा कल्पनाविलास विचलित करण्यासाठीच. तेव्हा याकडे लक्ष न देता ‘खुर्चीध्येय’ गाठणे हेच योग्य. हा रंग दिसायला आकर्षक. सौंदर्यवाद सांगणारा, प्रेम, धुंदीच्या जवळ जाणारा. दादांचा रोखठोक स्वभाव याच्याशी मेळ खाणारा नाहीच. त्यामुळे पतन अटळ ही टीकाही अयोग्य. सारे जग जिंकायची ताकद केवळ याच रंगात. त्यामुळे तुम्ही हे मतांचे युद्ध प्रेमाचा वर्षाव करून सहज जिंकाल. हेही वाचा >>> अन्वयार्थ : थेट भरतीचे धोके काही शहाणे म्हणतात त्या तेलंगणमधल्या बीआरएसचा रंगही हाच होता. म्हणून निवडणुकीत ते दणकून आपटले. अशा तुलनेकडे लक्ष न देणेच उत्तम. या लोकांना त्या केसीआर यांनी दहा वर्षे भोगलेले मुख्यमंत्रीपद दिसत नाही. त्यामुळे हा रंग त्यागण्याचा विचार नकोच. किमान दहा वर्षे तरी राज्यप्रमुखपद देण्याची शक्यता याच रंगात (थँक्स टू अरोरा) इतकी वर्षे ‘उपमुख्य’ म्हणून कळ सोसली. आता माघार नाही हाच तुमचा बाणा हवा. तुमच्या बंगल्यासमोर गुलाबी रंगाच्या वस्तुविक्रेत्यांची गर्दी झाली आहे. कोरा कागदसुद्धा गुलाबी रंगात भिजवून व वाळवून विकला जातोय. या रंगाची निर्मिती करणारे उद्योग अहोरात्र मेहनत करून उत्पादनवाढीला लागलेत. अशा सूतावरून स्वर्ग गाठणाऱ्या टोमणेवजा प्रतिक्रियांकडे दुर्लक्ष करणेच उत्तम. मग इतर रंगांनी काय घोडे मारले अशा प्रतिक्रियासुद्धा नतद्रष्टपणाचे प्रतीक. राजकारण हे गुलाबीपणाशी निगडित नाही. अलीकडे त्यात कमालीची स्पर्धा वाढली. ते फार भडक झाले व याच्याशी जवळ असलेला रंग लाल. त्यामुळे दादांनी गुलाबीपणा स्वीकारून चूक केली असे तर्कट मांडणारेसुद्धा पढतमूर्खच. त्याकडे लक्ष न देता यात्रेतले वातावरण अधिकाधिक गुलाबी कसे करता येईल याकडे लक्ष द्या दादा! हा प्रेमाचा रंग व यात बहुतेकांना गटांगळ्याच खाव्या लागतात. मतांचे प्रेम मिळाले नाही तर दादांची तीच गत होणार. यातून जनकल्याणविषयक भावनांचे प्रकटीकरण होत नाही, या प्रतिक्रिया म्हणजे कुत्सित भावनेच्या जणू प्रतीकच. त्याकडे कानाडोळा करून तुम्ही पुढे जा. लोकसभेतील यशामुळे सध्या गर्वाच्या घरात वावरणारे विरोधक या रंगावरून तुम्हाला काहीही उपमा देत सुटलेत. या साऱ्यांची भाषा अयोग्यच व रंगाचा अपमान करणारी. त्यामुळे त्याकडे पाठ फिरवून हा तर रंगाचाच अपमान व अशांना जनता कधीही माफ करणार नाही अशी स्पष्ट व परखड भूमिका तुम्ही प्रत्येक सभेत नक्की घ्या. बघा मग तुम्ही, लोकच तुमच्यावर गुलाबपाकळ्यांचा वर्षाव करतील व प्रत्येक सभेच्या आधी या पाकळ्यांचे पेटारे घेऊन जाण्याचा तुमचा खर्च वाचेल. तेव्हा दादा, व्हा सज्ज ‘आज नही तो कभी नही’ असा नारा देत!
