तमिळनाडूचे मुख्यमंत्री एम. के. स्टॅलिन यांनी आपल्या पुत्राचा मंत्रिमंडळात समावेश करून द्रमुकमधील घराणेशाहीची परंपरा कायम ठेवली. घराणेशाही जणू काही भारतीय राजकारणाचा अविभाज्य भागच झालेला आहे. नेतेमंडळी आपली पत्नी, मुले, मुली, जावई, सुना आदींनाच सत्तेत किंवा पक्षाच्या पदांमध्ये प्राधान्य देतात. दक्षिणेकडील राज्यांमध्ये हा कल अधिकच अनुभवास येतो. देवेगौडा, करुणानिधी, एम. जी. रामचंद्रन, करुणाकन, एन. टी. रामाराव, चंद्राबाबू नायडू, वाय. एस. राजशेखर रेड्डी, जी. के. मूपनार, एस. आर. बोम्मई, के. चंद्रशेखर राव, पिनयारी विजयन आदी डावे, उजवे, समाजवादी कोणीच या गोष्टीला अपवाद नाहीत. डावे पक्ष नेहमी घराणेशाहीला नाके मुरडतात, पण केरळमध्ये मुख्यमंत्री विजयन यांनी विधानसभेत पहिल्यांदा निवडून आलेल्या आपल्या जावयाचा मंत्रिमंडळात समावेश केला. तेलंगणात के. चंद्रशेखर राव मुख्यमंत्री तर त्यांचे पुत्र रामाराव हे मंत्री आहेत. याशिवाय त्यांची कन्या आमदार आहेच. शेजारील तमिळनाडूत स्टॅलिन मुख्यमंत्री तर आता त्यांचे पुत्र उदयनिधी यांचा मंत्रिमंडळात समावेश झाला आहे. स्टॅलिन यांच्या सावत्र भगिनी कानीमोझी खासदार आहेतच. राज्यात महाविकास आघाडीचे सरकार सत्तेत असताना उद्धव ठाकरे मुख्यमंत्री तर त्यांचे पुत्र आदित्य हे मंत्रिमंडळात होते.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
