तर्कतीर्थ लक्ष्मणशास्त्री जोशी मूलत: वेदशास्त्रसंपन्न पंडित असल्याने चार वेद, सहा शास्त्रे आणि १८ पुराणांचे जाणकार होते. ऋग्वेद, यजुर्वेद, सामवेद आणि अथर्ववेद यांवर तर्कतीर्थांनी लिहिलेल्या नोंदी वाचताना या वेद वाङ्मयाच्या त्यांच्या सखोल ज्ञानाची प्रचीती येते. ‘वेद व वेदांगे’ नोंद वाचू लागलो की, वेद संहिता, ब्राह्मण ग्रंथ, आरण्यके, उपनिषदे यांबरोबर षडंग वेद (शिक्षा, कल्प, व्याकरण, निरुक्त, छंद, ज्योतिष) ते जाणून होते, हे लक्षात येते. असे तर्कतीर्थ जेव्हा इंग्रजी तत्त्वज्ञान आणि साहित्य वाचू लागले, तेव्हा त्यांच्या पूर्वधारणांमध्ये परिवर्तन होणे स्वाभाविक होते. मार्क्सवाद कोळून प्याल्यानंतर त्यांचे रॉयवादी होणे अजिबात आश्चर्यकारक वाटत नाही. प्रो. श्री. व्यं. पुणतांबेकर यांनी भारत इतिहास संशोधन मंडळ, पुणेच्या १५ जून, १९३९ ला संपन्न वार्षिक उत्सवात मार्क्सच्या इतिहासवादावर जे व्याख्यान दिले होते, त्याचा प्रतिवाद करणारे तीन लेख तर्कतीर्थांनी ‘चित्रा’ साप्ताहिकाच्या ऑगस्ट, सप्टेंबर, १९३९ च्या अंकांत सलग लिहिले होते, ते वाचताना मार्क्सवादावर त्यांची हुकुमत किती होती, हे जाणवते.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
