उलटा चष्मा: उफ् .. उर्फी

बघता बघता ही वार्ता तिथे हजर असलेल्या प्रत्येकाच्या कानी गेली आणि त्या कपडय़ांच्या ढिगाभोवती ही गर्दी जमली. ते बघून त्या दोघांनी एकेका कपडय़ाची बोली लावायला सुरुवात केली. हा पोत्यापासून शिवलेला ड्रेस लाख रुपयाला, हा सोफ्याच्या कव्हरपासून शिवलेला दीड लाखाला, हा मोबाइल कव्हर जोडून तयार केलेला ‘टू पीस’ दोन लाखाला. जमलेले लोकही त्यात सहभागी होऊ लागले. त्यात तरुणी आघाडीवर होत्या. तेवढय़ात मला मॅमचे फोन यायला लागले व माझी नशा खाडकन उतरली. मग मी धाबा मालकाकडे जाऊन सत्य काय ते सांगितले आणि हा लिलाव थांबवा असे विनवले. तो गर्दीत घुसला, पण त्याचेही कुणी ऐकेना. मॅमचे कपडे न्याहाळण्यात प्रत्येकजण गर्क. तेवढय़ात गर्दी बघून पोलीस आले. त्यांना पाहताच पाठलाग करणारे दोघे पसार झाले. मग गर्दीही पांगली. मी अस्ताव्यस्त पडलेले कपडे घडी करून बॅगमध्ये ठेवायचा प्रयत्न केला, पण चित्रविचित्र आकारामुळे ते जमेचना! शेवटी एका वेटरने इस्त्रीवाल्याला बोलावून आणले. त्याने पोत्यापासून आणि रेक्झिनच्या कव्हरपासून तयार केलेल्या कपडय़ांवर इस्त्री फिरवण्यास नकार दिला. अखेर कशाबशा घडय़ा करून ते कपडे बॅगमध्ये कोंबले आणि मॅमला सोडले तिथे हजर झालो. त्या ओरडतील म्हणून घडलेले काहीही सांगितले नाही. मग त्यांना विमानतळावर सोडले.’ चालकाच्या या जबाबावर बराच खल केल्यावर उबेरने ट्विटरवर जाहीर केले. ‘आमच्या सन्माननीय ग्राहक उर्फी जावेद यापुढे टॅक्सीसेवेचा लाभ घेऊ शकतील, फक्त त्यांच्या कपडय़ाची बॅग त्यांना सतत जवळ बाळगावी लागेल. ती वाहनात ठेवली व काही अनर्थ घडला तर त्याची जबाबदारी आमची राहणार नाही.’