दीड महिना उलटला.. टीईटीच्या निकालाचे काय?

खरगे, आमच्यासारखा प्रवास करून दाखवा!
‘रेल्वे सोडा नि बसने जा!’ ही बातमी (लोकसत्ता, २४ जाने.) वाचनात आली आणि अकलेचे दिवाळे निघालेल्या आपल्या मंत्र्यांची कीव करावीशी वाटली. मुंबई उपनगरीय रेल्वेने प्रवास करणाऱ्या मुंबईकरांना रेल्वेगाडय़ांची व फेऱ्यांची संख्या वाढवून, गाडी व फलाट यांमधील अंतर कमी करून, स्थानकांवरील समस्या दूर करून, परप्रांतीयांचे महाराष्ट्रात येणारे लोंढे रोखून दिलासा देण्याऐवजी बसने प्रवास करा असा सल्ला देणाऱ्या रेल्वेमंत्री मल्लिकार्जुन खरगे यांनी जरा सामान्य मुंबईकरांप्रमाणे प्रवास तरी करून दाखवावा.
उपनगरी रेल्वे सेवा ही सर्वात स्वस्त आणि वेळ वाचवणारी आहे म्हणूनच मुंबईकरांची जीवनवाहिनी आहे. मुंबई आणि उपनगरातील रस्त्यांवर होणारी वाहतूक कोंडी, वारंवार आडवे येणारे सिग्नल्स, टोलनाके आणि खड्डे यांमुळे रस्त्यांवरून अंतर कापायला अधिक वेळ लागतो हे एवढय़ा मोठय़ा पदावर बसणाऱ्या खरगेंना कळत नाही काय?  मुंबईकरांना आपल्या कार्यालयात पोहोचण्याकरिता रेल्वे आणि बेस्ट या दोहोंचा वापर करावा लागतो. रेल्वे प्रवाशांना भेडसावणाऱ्या समस्या आधी दूर कराव्यात, होणारे अपघात, जाणारे जीव वाचवण्यासाठी प्रथम उपाययोजना कराव्यात मग अकलेचे तारे तोडावेत, असेच खरगे यांना सांगावेसे वाटते.
 – प्राची कमलाकर गुर्जर, कळवा.

देशद्रोह्यांना कसले सुधारता?
आम आदमी पार्टीच्या महाराष्ट्रातील प्रमुख नेत्या अंजली दमानिया यांनी केलेले ‘अरुण गवळी आणि दाऊद इब्राहीम हेसुद्धा आम आदमी पक्षात येऊ शकतात व आम्ही त्यांना सुधारू’ हे वक्तव्य अत्यंत आक्षेपार्ह तसेच अत्यंत विनोदी आहे.
अगोदरच केजरीवाल यांच्यावर दिल्लीत धरणे धरल्याबद्दल पोलीस ठाण्यांत दोन गुन्हे दाखल करण्यात आले आहेत. त्यांचे दिल्लीचे कायदा मंत्री सोमनाथ भारती यांच्यावर बेकायदा कामांचे भरपूर आरोप लागले आहेत. त्यांच्या पक्षातून नुकतेच निलंबित झालेले बिन्नी उघडपणे केजरीवाल सरकारवर आरोप करीत आहेत आणि तिसरीकडे, दाऊद आणि गवळी यांना सुधारण्याचे हास्यास्पद वक्तव्य दमानिया करीत आहेत.
दाऊद इब्राहीम देशद्रोही गुन्हेगार आहे. देशात दहशतवाद पसरवणे, बॉम्बस्फोट व धार्मिक दंगली घडवणे, तस्करी अशा अत्यंत गंभीर गुन्ह्यांचे आरोप त्याच्यावर आहेत. त्याला पक्षात घेणे हासुद्धा देशद्रोहाचा गुन्हा ठरावा, पण दमानिया यांना याची फिकीर दिसत नाही.
-महेश भानुदास गोळे, कुर्ला (पश्चिम), मुंबई

आधी तपास, मग ‘पद्म’
डॉ. नरेंद्र दाभोलकर यांना पद्म पुरस्कार जाहीर झाल्याचे वाचले (२६ जाने.). त्यांच्या सामाजिक कार्याची केंद्र सरकारने ही पावतीच दिली आहे. या क्षेत्रात काम करणाऱ्या मंडळींना यापासून नक्कीच प्रेरणा घेता येईल. हा सन्मान आधी मिळायला हवा होता, ही अपेक्षाही योग्य आहे.
मला मात्र सरकारच्या दुट्टपी धोरणाची कमाल वाटते. एकीकडे या माणसाच्या कामाचा सन्मान करायचा आणि दुसरीकडे हे काम करताना बलिदान दिलेल्या व्यक्तीच्या खुनाचा तपास मात्र ढिसाळपणे करायचा.
जोपर्यंत दाभोलकर यांचे खुनी व त्यामागचे सूत्रधार सापडत नाहीत तोपर्यंत हा पुरस्कार स्वीकारणार नाही अशी भूमिका घ्यायला हवी, अन्यथा सरकार आपल्या तोंडाला पाने पुसायला नेहमीच उत्सुक असते!
-गार्गी बनहट्टी, मुंबई