नाशिक शहर जनराज्य आघाडीची कार्यकारिणी बरखास्त

आगामी लोकसभा व विधानसभा निवडणुका लक्षात घेऊन नाशिक शहर जनराज्य आघाडी व युवक आघाडीची कार्यकारिणी बरखास्त करण्यात आल्याचे संस्थापक अध्यक्ष आमदार डॉ. अपूर्व हिरे यांनी कळविले आहे.
पुढील निवडणुका डोळ्यांसमोर ठेवून आघाडीचे कार्य तळागाळात नेण्याच्या दृष्टिने कार्यकर्ते व पदाधिकाऱ्यांनी जोमाने काम करावे व जनतेचे प्रश्न सोडवावेत, या हेतूने दोन्ही कार्यकारिणी बरखास्त करण्यात आल्याचे पत्रकात म्हटले आहे. जनराज्य आघाडीने महापालिका निवडणुकीत उमेदवार उभे केले होते. त्यापैकी केवळ एकच उमेदवार विजयी झाले होते.
मालेगाव व सटाणा तालुक्यातही जनराज्य आघाडीचे बऱ्यापैकी बस्तान आहे.
आगामी विधानसभा निवडणुकीत आघाडी स्वत:चा उमेदवार उभे करण्याविषयी सांगितले जात आहे. नाशिक शहर जनराज्य आघाडी आणि नाशिक शहर जनराज्य युवक आघाडी यांची नवीन कार्यकारिणी लवकरच घोषित करण्यात येईल, असेही डॉ. हिरे यांनी निवेदनात म्हटले आहे.