विराट कोहली हा जगातील सध्याचा सर्वोत्तम फलंदाज आहे, अशा शब्दांत भारताचे माजी महान क्रिकेटपटू सुनील गावसकर यांनी कोहलीचे कौतुक केले आहे. कोहलीच्या तडाखेबाज खेळाच्या जोरावर भारताला ऑस्ट्रेलियावर सनसनाटी विजय मिळविता आला होता.
‘‘मर्यादित षटकांच्या क्रिकेटमध्ये त्याच्यासारखा अन्य कोणताही फलंदाज नाही, याबाबत मला तिळमात्र शंका नाही. तंत्रशुद्ध फलंदाजीबरोबरच आत्मविश्वासाने झंझावाती खेळ करण्याची क्षमता त्याच्याकडे आहे, हे त्याने वारंवार सिद्ध केले आहे. कांगारुंविरुद्ध त्याने केलेला धडाकेबाज खेळ सर्वानाच थक्क करणारा होता,’’ असे गावसकर यांनी सांगितले.
गावसकर म्हणाले, ‘‘कोणतेही दडपण न घेता तो सकारात्मक वृत्तीने फटकेबाजी करतो व संघाने त्याच्यावर टाकलेली जबाबदारी पार पाडतो. ज्या ज्या वेळी भारतास विजयासाठी मोठे लक्ष्य मिळाले होते, त्या त्या वेळी त्याने चौफेर टोलेबाजी करीत संघास विजय मिळवून दिला आहे. त्याच्याकडे ताकदवान व अचूक फटके मारण्याची क्षमता आहे, अशी क्षमता असलेले फारच कमी फलंदाज असतात. विजयी फटका आपणच मारला पाहिजे अशी वृत्ती त्याने कधीही दाखविलेली नाही. अनेक वेळा त्याने कर्णधार महेंद्रसिंग धोनीला सामना संपविण्याची संधी दिली आहे.’’
‘‘दडपणाखाली खेळताना अनेक मातबर फलंदाजही ढेपाळतात, मात्र कोहली याने अशा परिस्थितीत खूप संयमी वृत्ती दाखविली आहे. क्षेत्ररक्षण करतानाही त्याच्या या वृत्तीचा प्रत्यय अनेक वेळा पाहावयास मिळाला आहे. फलंदाजीच्या वेळी त्याच्या खेळात अतिशय परिपक्वता दिसून येते,’’ असेही गावसकर यांनी सांगितले. गावसकर यांनी धोनीचेही कौतुक केले. ते म्हणाले, ‘‘धोनी याने युवराज सिंगकडे गोलंदाजी दिली. खरेतर कांगारूंसाठी हा आश्चर्यकारक निर्णय होता, मात्र त्याने कर्णधार स्टीव्हन स्मिथचा महत्त्वपूर्ण बळी मिळवला. प्रतिस्पर्धी संघाची जमेची बाजू कोणती आहे व त्यांचा कमकुवतपणा कशात आहे याचा धोनी याला भरपूर अभ्यास आहे. सुरेश रैना हा खूप प्रभावीपणे चेंडू वळवत नाही व ऑस्ट्रेलियाविरुद्ध महागात पडला असता. त्याच्याऐवजी युवराजला चेंडू देण्याचा निर्णय भारतासाठी हितकारक ठरला. शेवटच्या महत्त्वपूर्ण षटकांमध्ये खूप धावा दिल्या जाणार नाहीत याची काळजी आशीष नेहरा घेत असतो. तसेच तो सुरुवातीच्या षटकांमध्ये हमखास एकतरी बळी घेतो व प्रतिस्पर्धी संघाच्या डावास खिंडार पाडण्याचे काम करतो. त्याचे भारतीय संघातील पुनरागमन संघासाठी किफायतशीर ठरले आहे.’’
कोहलीची फटक्यांची निवड अचूक -चॅपेल
भारताचा धडाकेबाज फलंदाज विराट कोहली हा ‘विजयवीर’ असल्याचे मत ऑस्ट्रेलियाचे माजी कर्णधार इयान चॅपेल यांनी व्यक्त केले. तसेच कोहलीचे फटक्यांची निवड करण्याचे कौशल्य हे वेस्ट इंडिजचा माजी दिग्गज ब्रायन लारापेक्षा उत्तम असल्याचे मतही चॅपेल यांनी व्यक्त केले.
ते म्हणाले, ‘‘आधुनिक काळातील खेळाडूंमध्ये लारा हाच चेंडूचा कौशल्याने सामना करू शकतो, असा माझा समज होता, परंतु कोहलीची फलंदाजी पाहता लाराला दुसरे स्थान देईन. ट्वेन्टी-२० क्रिकेटमधली ही मी पाहिलेली सर्वोत्तम खेळी होती. कोहली विजयवीर आहे. त्याने निर्माण केलेली स्वत:ची प्रतिष्ठा कालच्या खेळीने अधिक दृढ झाली. ती आनंददायी खेळी होती.’’ ‘‘लवचिक मनगट असलेले अनेक दिग्गज फलंदाज मी पाहिले आहेत, परंतु त्यामध्ये प्रचंड ताकद असलेला फलंदाज नव्हता. अझरुद्दीन, व्ही.व्ही.एस. लक्ष्मण आणि झहीर अब्बास या लवचिक मनगट असलेल्या फलंदाजांना मी पाहिले आहे. अब्बास यांचे मनगट रबरासारखे होते, परंतु विराटकडे प्रचंड ताकदही आहे. चेंडूवर तो त्याच जोरावर प्रहार करतो,’’ असे चॅपेल म्हणाले.
विराटचे ऑस्ट्रेलियाच्या प्रसारमाध्यमांकडून कौतुक
मेलबर्न : विराट कोहलीच्या धमाकेदार खेळीमुळे ऑस्ट्रेलियाचे ट्वेन्टी-२० विश्वचषक स्पध्रेतील आव्हान संपुष्टात आले. तरीही ऑस्ट्रेलियातील प्रसारमाध्यमांनी विराटच्या विजयी खेळीचे कौतुक केले आहे. विराटने एकहाती खिंड लढवत भारताला विजयाबरोबर उपांत्य फेरीत प्रवेश मिळवून दिला. १६१ धावांचा पाठलाग करताना विराटने ५१ चेंडूंत नाबाद ८२ धावांची निर्णायक खेळी करून ऑस्ट्रेलियाच्या जेतेपदाच्या स्वप्नांचा चुराडा केला. ‘‘स्टीव्ह स्मिथने या खेळीचे ‘विराट शो’ असे केलेले वर्णन योग्य आहे,’’ असे ख्रिस बॅराट यांनी ‘दी सिडनी मॉर्निग हेराल्ड’मधील त्यांच्या स्तंभात लिहिले आहे. त्यांनी पुढे असेही लिहिले की, ‘‘ट्वेन्टी-२० आंतरराष्ट्रीय क्रिकेटमधील विराट कोहलीची ही सर्वोत्तम खेळीपैकी एक आहे. त्याच्या एकहाती खेळीने विश्वविजेत्या ऑस्ट्रेलियाला गाशा गुंडाळाला लागला.’’ ‘दी डेली टेलेग्राफ’मध्ये बेन हॉर्न यांनी आपल्या स्तंभात विराटच्या खेळीचे वर्णन ‘एकहाती विजय’ असे केले आहे. ‘‘सध्याच्या घडीला जागतिक क्रिकेटमध्ये विराट कोहलीसारखी प्रतिभा नाही, माझ्या या मताशी सर्व सहमत असतील,’’ असे हॉर्न म्हणाले. याबरोबर ‘दी ऑस्ट्रेलिया’ या वृत्तपत्रातूनही कोहलीवर कौतुकाचा वर्षांव करण्यात आला आहे.
विराटची खेळी अविश्वसनीय – स्टिव्ह स्मिथ
मोहाली : विराट कोहलीच्या अविश्वसनीय खेळीने ऑस्ट्रेलियाचा विजयाचा घास हिरावला, परंतु ऑस्ट्रेलियाचा कर्णधार स्टिव्ह स्मिथने त्याला सलाम ठोकला. तो म्हणाला,‘‘फलंदाजीसाठी पोषक नसलेल्या खेळपट्टीवर विराटने साकारलेली खेळी कौतुकास पात्र आहे. भारतीय संघाला विजयासाठी प्रत्येक चेंडूवर दोन धावांची आवश्यकता होती आणि त्या वेळी आमची बाजू वरचढ होती. प्रचंड दबावाखाली असूनही विराटने केलेली खेळी अविश्वसनीय म्हणावी लागेल. त्याच्या खेळीला सलाम.’’
धावांचा पाठलाग करताना पुन्हा एकदा विराटने आपली उपयुक्तता सिद्ध केली आणि त्यामुळेच त्याची तुलना भारताचा माजी दिग्गज फलंदाज सचिन तेंडुलकरशी केली जाऊ लागली आहे.
भारतीय संघाचा जल्लोष
मोहाली : ऑस्ट्रेलियासारख्या व्यावसायिक आणि चिवट संघावर रोमहर्षक विजय मिळवल्यानंतर भारतीय संघाने ट्वेन्टी-२० विश्वचषक स्पध्रेच्या उपांत्य फेरीत प्रवेश निश्चित केला. विजयासाठी प्रति चेंडूवर दोन धावा, या सरासरीने धावांची आवश्यकता असताना सीमारेषेबाहेर बसलेल्या भारतीय खेळाडूंच्या, संघ संचालक रवी शास्त्रींच्या आणि उपस्थित व घरबसलेल्या प्रत्येक चाहत्यांच्या चेहऱ्यावरील तणाव कर्णधार महेंद्रसिंग धोनीच्या विजयी चौकाराने झटक्यात नाहीशे झाले. त्यानंतर भारताच्या विजयाचा ‘विराट’ जयघोष स्टेडियमवर दुमदुमला.
