Airtel Network Down: शुक्रवारी (११/०२/२०२२) देशभरातील एअरटेल वापरकर्त्यांना अनेक समस्यांना सामोरे जावे लागले. एअरटेलच्या ब्रॉडबँड (Broadband) आणि मोबाइल ग्राहकांनी शुक्रवारी सोशल मीडियावर नेटवर्क डाउन झाल्याची तक्रार केली. नेटवर्क डाउन झाल्यामुळे एअरटेलच्या फायबर इंटरनेट सेवा तसेच मोबाईल इंटरनेट सेवांवरही वाईट परिणाम झाला.
इंटरनेट आउटेज ट्रॅकर DownDetector नुसार, देशातील विविध शहरे आणि जिल्ह्यांमधील एअरटेल वापरकर्त्यांना या आउटेजमुळे समस्यांना सामोरे जावे लागत आहे. DownDetector च्या मते, एअरटेल यूजर्सना शुक्रवारी ११ वाजल्यापासून इंटरनेटशी संबंधित समस्या होत्या. एअरटेलने या संपूर्ण प्रकरणावर ट्विट करून आउटेजची पुष्टी केली आहे. यासोबतच कंपनीने सांगितले की, एअरटेलच्या नेटवर्कमधील त्रुटी दूर करण्यात आल्या आहेत आणि आता सर्व सेवा सामान्यपणे कार्यरत आहेत. तरीही अनेक वापरकर्ते सोशल मीडियावर अजूनही सेवा नीट न झाल्याचं सांगत आहेत.
कंपनीने मागतली माफी
आपल्या ग्राहकांची माफी मागत, एअरटेलने ट्विट केले की, “आमच्या इंटरनेट सेवेमध्ये एक तात्पुरती समस्या आली आणि तुम्हाला झालेल्या गैरसोयीबद्दल आम्ही दिलगीर आहोत. आता सर्व काही सामान्य झाले आहे कारण आमची टीम आमच्या ग्राहकांना उत्तम अनुभव देण्याच्या दिशेने काम करत आहे.”
मोबाईल आणि इंटरनेट सेवांबाबत अशा समस्या फारच कमी होतात. आज एअरटेलने सुमारे तासाभरात समस्या सोडवली, परंतु काही दिवसांपूर्वी जेव्हा जिओ (Jio) चे नेटवर्क डाउन होते तेव्हा जिओ ग्राहकांना सुमारे ८ तास सुरळीत सुविधा न्हवती.
