Apple Watch For Kids : सध्या स्मार्टफोन काळाची गरज ठरला आहे. स्मार्टफोन अगदी बारीकसारीक गोष्टींसाठी उपयोगी ठरतो आहे. पण, याचे दुष्परिणामही तितकेच आहेत. त्यामुळे लहान मुलांना त्यापासून कसं दूर ठेवावं याचे अनेक पर्याय त्यांचे आई-बाबा शोधत असतात. लहान मुलं शाळा, क्लासमध्ये गेल्यावर ते कधी घरी येतील? पावसापाण्यात कुठे अडकले तर नाहीत ना? खेळताना कुठे पडले, तर त्याबद्दल माहिती कोण देईल, असे अनेक प्रश्न पालकांच्या मनात असतात. तर आता ॲपल कंपनी या चिंताग्रस्त पालकांसाठी काहीतरी खास घेऊन आली आहे.
ॲपलनं भारतात ‘ॲपल वॉच फॉर युअर किड्स’ हे फीचर जाहीर केलं आहे. हे फीचर त्या प्रत्येक पालकासाठी उपयोगी ठरेल; ज्यांना असं वाटतं की, आपल्या मुलांनी कमी वयात स्मार्टफोन वापरू नये. पण, तरीही त्या मुलांकडे असं काही डिव्हाइस असावं; जेणेकरून ते नेहमी मुलांच्या संपर्कात राहू शकतील. तसेच ते कुठे आहेत, ते काय करत आहेत याचा वेळोवेळी आढावा घेऊ शकतील. म्हणजेच लांब असूनसुद्धा पालक त्यांच्या मुलांशी संवाद साधू शकतील. यादरम्यान ते मुलांना मेसेज, कॉल, त्यांच्या आरोग्य, फिटनेसबद्दलही जाणून घेऊ शकतील; जे तुम्हाला सहसा Apple Watch वर मिळतात.
तुमच्या मुलांसाठी ॲपल वॉच कसे सेट करावे ?
‘ॲपल वॉच फॉर युअर किड्स’ हे फीचर आता भारतात लाँच करण्यात आलं आहे. पण, हे फीचर अशा युजर्ससाठी उपलब्ध असेल ; ज्यांच्याकडे ॲपल वॉच सिरीज ४ किंवा त्यानंतरचे व्हर्जन आहे किंवा ॲपल वॉच एसई आहे ; जे आयफोन ८ किंवा नंतरचे नवीन वॉचओएस आणि आयओएस सह कनेक्ट आहे.ॲपल वॉचला सेल्युलर सर्व्हिस ॲक्टिव्ह करण्यासाठी वायरलेस सर्व्हिस प्लॅन आवश्यक आहे. सध्या ॲपलनं या फीचरसाठी केवळ जिओबरोबर भागीदारी केली आहे. म्हणजेच जर तुम्हाला हे फीचर वापरून पाहायचं असेल, तर ॲपल वॉचसाठी नवीन जिओ कनेक्शन घेणं आवश्यक आहे. तुमच्या मुलांसाठी ॲपल वॉच सेट करण्याकरिता तुम्हाला पुढील गोष्टी लक्षात ठेवाव्या लागतील…
१. पालकांपैकी किमान एकाकडे तरी आयफोन असला पाहिजे.
२. आयफोनबरोबर जोडल्यानंतर मुलाच्या ॲपल वॉचवर हे फीचर सक्रिय केले जाईल.
३. घड्याळात eSIM सेट करणे.
मुलांवर कसे नियंत्रण ठेवता येईल?
ॲपल वॉच मुलांना त्यांचं स्वातंत्र्य आणि पालकांना त्यांची काळजी घेण्याची परवानगी देईल. ॲपल वॉचवरून मुलं कोणाशी संपर्क साधू शकतात हे पालक ठरवतील. मुलांचं लोकेशन ट्रॅक करतील. ॲपल वॉचवर DND प्रोफाइल असेल; जे मुलाच्या शाळेचं वेळापत्रक, एक्स्ट्रा क्लासबद्दल माहितीही देईल. केव्हा कोणतं नोटिफिकेशन, कॉल ब्लॉक करायचा या गोष्टींवरसुद्धा आई-बाबा नियंत्रण ठेवू शकतील. आई-बाबा सेटिंग्जमधून डाउनटाइम शेड्युल करू शकतील. तुम्ही डाउनटाइम सेट केल्यावर, फक्त निवडलेले फोन कॉल आणि निवडक ॲप्समध्येच मुलं प्रवेश करू शकतील.
मुलांना ॲपल वॉचद्वारे ॲप स्टोअरमध्ये प्रवेश करता येईल; पण आईबाबांना त्यांच्या आयफोनवरून प्रत्येक गोष्ट डाउनलोड करण्यास परवानगी द्यावी लागेल. लहान मुलं वॉचद्वारे आपत्कालीन सेवांमध्ये प्रवेश करू शकतात. आई-बाबा मुलांना होणारी ॲलर्जी, रक्तगट, वय, उंची आदी माहितींसह त्यांचं एक प्रोफाइल तयार करू शकतात; जे आपत्कालीन परिस्थितीत उपयुक्त ठरू शकतं.
