कॅलिफोर्निया : iPhone 15 Launch Today युरोपीय महासंघाने घातलेल्या अटीची पूर्तता करत ‘अ‍ॅपल’ने नव्या आयफोनमध्ये ‘सी-टाइप’ पद्धतीच्या चार्जिगचा अंतर्भाव केला आहे. त्यामुळे आता अँड्रॉइड आणि आयफोनमधील एक मोठा भेद संपुष्टात आला असून कोणत्याही ‘सी टाइप चार्जिग केबल’ने आयफोनसह अ‍ॅपलची अन्य उत्पादने चार्ज करणे शक्य होणार आहे. भारतामध्ये सुरूवातीला आयफोन-१५ची किंमत साधारणत: ६६ हजार रुपयांच्या आसपास असण्याची शक्यता आहे.
डायनमिक आयलँड, ४८ मेगापिक्सल कॅमेरा तसेच अधिक क्षमतेची बॅटरी असलेल्या ‘आयफोन १५’च्या नव्या श्रेणीची घोषणा कुपरटिनो येथील कंपनीच्या मुख्यालयात मंगळवारी रात्री झालेल्या वार्षिक कार्यक्रमात करण्यात आली. आयफोन १५, आयफोन १५ प्लस, आयफोन १५ प्रो, आयवॉच सीरिज ९, आयवॉच अल्ट्रा २ आदी उत्पादनांची घोषणा यावेळी करण्यात आली. आयफोन १५ ची किंमत ७९९ डॉलर ठरवण्यात आली असून १५ प्लस ८९९ डॉलर, तर १५ प्रो ९९९ डॉलरना अमेरिकेतील बाजारात उपलब्ध होईल. हे दोन्ही फोन भारतात कधी उपलब्ध होतील, हे कंपनीने रात्री उशिरापर्यंत जाहीर केले नव्हते.
नवीन आयवॉचचे प्रमुख वैशिष्टय़ म्हणजे हे उत्पादन टाकाऊ वस्तूंतील धातूंच्या पुनर्वापरातून बनवण्यात आले आहे. याद्वारे शून्य कार्बन उत्सर्जन संकल्पना अमलात आणल्याचे ‘अ‍ॅपल’ने जाहीर केले. त्याचप्रमाणे नव्या आयफोन १५मध्ये पूर्णपणे रिसायकल केलेल्या कोबाल्ट बॅटरीचा वापर करण्यात आला आहे. अमेरिकेशी बिघडलेल्या संबंधांच्या पार्श्वभूमीवर चीनने आयफोनच्या वापरावर निर्बंध आणल्यामुळे आयफोनच्या विक्रीत घसरण झाली आहे. या पार्श्वभूमीवर मंगळवारी झालेल्या कार्यक्रमाद्वारे आयफोनची लोकप्रियता पुन्हा वाढवण्याचा प्रयत्न अ‍ॅपलने केला आहे.
