Apple UPI App: Apple ही एक दिग्गज टेक कंपनी आहे. तसेच कंपनी आपल्या ग्राहकांसाठी नवनवीन गॅजेट्स लॉन्च करत असते. नुकतेच Apple ने भारतामध्ये आपली दोन रिटेल स्टोअर्स सुरू केली आहेत. मुंबई आणि दिल्ली येथे रिटेल स्टोअर्स सुरू झाली आहेत. आता कंपनी लवकरच Google Pay, Paytm आणि इतर पेमेंट अ‍ॅपनंतर भारतात Apple Pay लॉन्च करू शकते. टेक जायंट देशामध्ये त्याचे डिजिटल पेमेंट अ‍ॅप लॉन्च करण्याबाबत नॅशनल पेमेंट्स कार्पोरेशन ऑफ इंडिया (NPCI) शी चर्चा करत आहे. याबाबत प्राथमिक चर्चा झाली असून Apple या योजनेवर आता काम करत असल्याची माहिती समोर येत आहे.
अ‍ॅपलसाठी भारत एक महत्त्वाची बाजारपेठ बनली आहे. तसेच कंपनी भारतीय ग्राहकांसाठी Apple पे लॉन्च करण्यास उत्सुक आहे. देशामध्ये सध्या उपलब्ध असलेल्य्या अन्य डिजिटल पेमेंट अ‍ॅपसारखेच आयफोन वापरकर्त्यांना QR कोड स्कॅन करणे आणि UPI पेमेंट करण्याची परवानगी देईल. तथापि Apple आणि NPCI या दोघांनीही याबद्दलच्या ताज्या घडामोडींबद्दल भाष्य करणे टाळले आहे. याबाबतचे वृत्त Business Today ने दिले आहे.
भारताने नवीन कल्पना आणि प्रयोगांसाठी एक सुरक्षित मजबूत असे वातावरण तयार केले आहे. विशेषतः UPI डिजिटल पेमेंट प्रणाली सुरु केल्याने. देशातील लाखो लोकांसाठी युपीआय पेमेंट सेवा फायदेशीर ठरली आहे. खरेतर २०२२ ते २०२३ पर्यंत भारतात झालेल्या सर्व डिजिटल व्यवहारांसाठी ७५ टक्के UPI चा वापर झाला. २०२६ ते २०२७ पर्यंत प्रत्येक दिवसाला डिजिटल पेमेंट सेवा १ अब्ज व्यवहारांपर्यंत पोहोचेल असा तज्ञांचा अंदाज आहे. केवळ मे महिन्यातच नऊ अब्ज व्यवहारांची रेकॉर्डब्रेक नोंद NPCI ने केली आहे.
Apple Pay हे आयफोन, आयपॅड , Apple वॉच आणि मॅक यासह विविध Apple डिव्हाइसच्या माध्यमातून सोपे,सुरक्षित आणि खाजगी पेमेंटची सुविधा देईल. याचा वापर करणारे वापरकर्ते यामध्ये सहभागी असणाऱ्या बँकाचे क्रेडिट, डेबिट किंवा प्रीपेड कार्ड लिंक करू शकतात. शिवाय अमेरिकेमध्ये Apple नुकतीच आपली Pay Late सेवा सुरू केली आहे.
