एलॉन मस्क यांनी काही दिवसांपूर्वी ट्विटरचे नाव बदलून एक्स असे केले आहे. म्हणजेच ट्विटर या सोशल मीडिया प्लॅटफॉर्मला ‘एक्स’ या नावाने ओळखले जाते. मस्क आपल्या वापरकर्त्यांसाठी अनेक नवनवीन फीचर्स किंवा अपडेट्स आणि अन्य गोष्टी लॉन्च करत असतात. एलॉन मस्क यांनी एक्स (पूर्वीचे ट्विटर) वापरकर्त्यांसाठी दोन नवीन प्रीमियम सबस्क्रिप्शन प्लॅन लॉन्च केले आहेत. मस्क यांनी एक जाहिराती दिसणारा बेसिक प्लॅन व जाहिराती न दुसरा एक प्रीमियम प्लॅन लॉन्च केला आहे. या प्लॅन्सची किंमत व त्या दोन प्लॅन्समध्ये वापरकर्त्यांना काय फायदे मिळणार आहेत , त्याबद्दल अधिक माहिती जाणून घेऊयात.
एलॉन मस्क यांनी प्रीमियम + आणि एक बेसिक असे दोन सबस्क्रिप्शन प्लॅन लॉन्च केले आहेत. त्यातील बेसिक प्लॅनची किंमत $३ (प्रति महिना) म्हणजे २४३.७ रुपये असणार आहे. हा प्लॅन खरेदी केल्यास वापरकर्त्यांना जाहिराती दिसणार आहेत. या प्लॅनमध्ये निळ्या चेकमार्कचा (Blue Checkmark) समावेश नसणार आहे. या प्लॅनमध्ये वापरकर्त्यांना असत एडिट करण्यासाठी आणि मोठा मजकूर आणि व्हिडीओ पोस्ट करण्याच्या सुविधा देखील मिळणार आहेत. एक गोष्ट लक्षात घेणे आवश्यक आहे की , लॉन्च करण्यात आलेले दोन्ही प्लॅन्स सध्या वेब वरच खरेदी करता येणार आहेत.
एलॉन मस्क यांनी एक्सवर पोस्ट केले, ”आम्ही ३ अमेरिकी डॉलर प्रति महिना (वेबच्या माध्यमातून जॉईन केल्यानंतर) साठी एक नवीन बेसिक टिअर पण लॉन्च करत आहोत जे तुम्हाला , सर्वात महत्वाच्या प्रीमियम सुविधा देणार आहोत.”
तसेच एलॉन मस्क यांनी $१६ (प्रति महिना) १,३०० रुपयांचा प्रीमियम प्लस प्लॅन लॉन्च केला आहे. या प्लॅनची खरेदी केल्यास वापरकर्त्यांना जाहिराती अजिबात दिसणार नाही आहेत. एलॉन मस्क यांनी ऑक्टोबर २०२२ मध्ये एक्स (पूर्वीचे ट्विटर) ची ४४ बिलियन मध्ये खरेदी केले आहे. तेव्हापासून सोशल मीडिया प्लॅटफॉर्मवरून मोठ्या प्रमाणात महसूल मिळवण्यासाठी मस्क वेगवगेळे प्रयत्न करताना दिसत आहेत.
