ट्विटर (आताचे एक्स) या मायक्रोब्लॉगिंग सारखे देशी कू ॲप चार वर्षांपूर्वी सुरू करण्यात आले होते. मात्र आता हे ॲप बंद करण्याची घोषणा करण्यात आली आहे. आर्थिक अडचणी आणि बाजारातील अनिश्चितता यामुळे ॲप बंद करत असल्याचे संस्थापकांनी सांगतिले. संस्थापक अप्रमेय राधाकृष्ण आणि मयांक बिदवातका यांनी लिंक्डइनवर पोस्ट टाकून 'गुड बाय' म्हणत ही बातमी दिली. सोशल मिडियावर उपलब्ध असलेल्या बऱ्याच मायक्रोब्लॉगिंग साईटवर इंग्रजी भाषेची चलती आहे. मात्र कू ॲपनं देशी भाषांमध्ये संवाद साधण्याची संधी निर्माण केली होती. लिंक्डइनवर केलेल्या पोस्टमध्ये संस्थापकांनी कू ॲप सुरू करण्यामागची भावना काय होती, हे सांगितले. "लोकशाहीमध्ये अभिव्यक्ती स्वातंत्र्याची गळचेपी होऊ नये तसेच सामान्यांना स्वतःच्या भाषेत सोशल मीडियावर व्यक्त होता यावे, यासाठी आम्ही कू ॲपची सुरुवात केली होती. ॲप सारख्या क्षेत्रात अमेरिकेचा दबदबा आहे. आम्हाला वाटलं की भारतही यामध्ये आपले योगदान देऊ शकतो", असा विचार आम्ही केल्याचे ते म्हणाले. २०२० साली ट्विटरला पर्याय म्हणून 'कू' ॲपची सुरुवात झाली होती. त्यावेळी अनेक सेलिब्रिटी, मंत्री यांनी याची जाहिरात केली होती. तसेच भारताबाहेर नायजेरिया आणि ब्राझिलमध्ये कू ॲपला चांगला प्रतिसाद मिळाला होता. ट्विटरवर निळ्या चिमणीचा प्रतिकात्मक फोटो दिलेला आहे. तर कू ॲपवर पिवळ्या रंगची चिमणी देण्यात आली होती. आजपर्यंत तब्बल सहा कोटी लोकांनी हे ॲप डाऊनलोड केले होते. ॲपची सुरुवात झाल्यानंतर फेब्रुवारी २०२१ मध्ये ४.१ दशलक्ष डॉलरचे भांडवल आणि त्यानंतर टायगर ग्लोबल फर्मीकडून आणखी ३१ दशलक्ष डॉलर्सचे भांडवल कू ने जमा केले होते. तरीही त्यांच्यासमोर आर्थिक अडचणी उभ्या राहिल्या. कू ॲपवर दिवसाला वीस लाख वापरकर्ते रोज भेट देत होते. तसेच महिन्याला जवळपास १० कोटी युजर हे ॲप वापरत होते. विविध क्षेत्रातील जवळपास ९००० महत्त्वाची मंडळी सदर ॲप वापरत होते. एक्सलाही मध्यंतरी मागे टाकत कू ॲपने चांगलीच प्रसिद्धी मिळविली होती. २०२२ साली भारतात एक्सला चांगली टक्कर देण्याचे काम कूने केले होते. कू डब्यात का गेलं? सुरुवातीच्या काही काळात यश मिळूनही कू ॲपला नंतर भांडवल गोळा करण्यात अपयश आले. त्यामुळे त्यांना नाईलाजाने कर्मचाऱ्यांची संख्या घटवावी लागली. डेलीहंटमध्ये विलीन करण्याची चर्चा फिस्कटल्यानंतर 'कू' ॲपची शेवटची अपेक्षाही धुळीस मिळाली. संस्थापक राधाकृष्ण आणि बिडवातका यांनी सांगितले की, ॲपसारखे तंत्रज्ञान सेवा हाताळण्यासाठी मोठा खर्च येतो. त्यामुळे चांगले भागीदार असल्याखेरीज अशा कंपन्या चालविणे जिकरीचे होऊन बसते.