सध्याचा काळ हा इंटरनेटचा काळ आहे. भारतामध्ये सध्या ५जी नेटवर्क सुरू झाले आहे. देशातील रिलायन्स जिओ आणि एअरटेल या दोन टेलिकॉम कंपन्या आपल्या ग्राहकांना ५ जी नेटवर्कची सुविधा देत आहेत. आता ६ जी नेटवर्कबद्दल देखील मोठी बातमी समोर येत आहे. केंद्रीय दळणवळण व इलेक्ट्रॉनिक्स आणि माहिती तंत्रज्ञान मंत्री अश्विनी वैष्णव यांनी सोमवारी भारत 6G अलायन्सच्या लॉन्चिंगची घोषणा केली. ५जी च्या यशस्वी अंमलबजावणीनंतर भारतात पुढील जनरेशनची टेक्नॉलॉजी लॉन्च करण्याच्या दृष्टीने हा एक महत्वाचा उपक्रम असणार आहे.
भारत ६ जी अलायन्स, दूरसंचार टेक्नलॉजी प्रगत करण्याच्या आणि भारतामध्ये ६ जीच्या डेव्हलपमेंटला पुढे नेण्याच्या उद्देशाने सार्वजनिक आणि खाजगी क्षेत्रातील तसेच इतर विभागांमधील प्रमुख भागधारकांना एकत्र आणते. एका कार्यक्रमावेळी केंद्रीय मंत्री अश्विनी वैष्णव यांनी ६जी टेक्नॉलॉजीच्या क्षेत्रामध्ये भारताच्या प्रगतीवर प्रकाश टाकला. ज्यात आधीपासूनच २०० पेक्षा जास्त पेटंट मिळवले आहेत. याबाबतचे वृत्त Business Today ने दिले आहे.
भारत ६ जी अलायन्सशिवाय सरकार येणाऱ्या काही आठवड्यांमध्ये दूरसंचारमध्ये काही सुधारणा करण्याच्या दृष्टीने योजना तयार करत आहे. ६जी चे अपेक्षित आगमन ५जी पेक्षा जवळपास १०० पट अधिक वेग प्रदान करेल. भारत ६जी अलायन्स एक प्रगत दूरसंचार टेक्नॉलॉजी आणि पडलं दशकाला आकार देणाऱ्या प्लॅटफॉर्मच्या विविध पैलूंवर व्यापक चर्चेसाठी व्यासपीठ म्हणून काम करेल.
पंतप्रधान नरेंद्र मोदी यांनी यावर्षी मार्चमध्ये ६जी व्हिजन डॉक्युमेंटचे लॉन्चिंग केले होते. व्हिजन डॉक्युमेंटमध्ये पुढील काही वर्षांत 6G दूरसंचार सेवा विकसित आणि लॉन्च करण्याच्या भारताच्या सर्वसमावेशक योजनांची रूपरेषा देण्यात आली आहे. केंद्रीय दळणवळण राज्यमंत्री देवुसिंह चौहान यांनी नऊ महिन्यांच्या कालावधीमध्ये २.७० लाख ५जी साइट्सच्या स्थापनेसह ५जी नेटवर्क त्वरित सुरु करण्याच्या भारताच्या यशाची कबुली दिली.