Fake WhatsApp Calls: सोशल मीडियामुळे जग जवळ आलं आहे असे म्हटले जाते. याच्या वापरामुळे लोक डिजिटल स्वरुपात एकमेकांच्या जवळ आले आहेत. पण या माध्यमामुळे काही वाईट गोष्टी देखील घडत आहेत. सोशल मीडियाचा वापर करुन सर्वसामान्यांना फसवणाऱ्यांचे प्रमाण दिवसेनदिवस वाढत आहे. लोकांची फसवणूक करण्यासाठी डिजिटल चोर निरनिराळे उपाय करत असल्याचे पाहायला मिळते. गेल्या काही दिवसांपासून व्हाट्सअ‍ॅपवर अनोळखी आंतरराष्ट्रीय नंबर्सवरुन कॉल, मेसेज येण्याबाबत तक्रार वाढल्या आहेत. व्हाट्सअ‍ॅपवर +254, +84, +63 या क्रमांकांनी सुरुवात होणाऱ्या आंतरराष्ट्रीय नंबरवरुन फोन किंवा मेसेज आल्यावर तो नंबर Report And Block करण्याचे आदेश सरकारने दिले आहेत.
गृह मंत्रालयाच्या Indian Cybercrime Coordination Center (I4C) द्वारे याबाबतीमध्ये अलर्ट जारी करण्यात आला आहे. सामान्य जनता सायबर क्राईमला बळी पडू नये यासाठी हा महत्त्वपूर्ण निर्णय घेण्यात आला आहे. डेटा अ‍ॅनालिस्ट अ‍ॅंड फोरेंसिक विभागातील तज्ज्ञ सायबर हल्ला रोखण्यासाठी सरकारला मदत करत असतात. या विभागातील तज्ज्ञांनी ANI ला दिलेल्या माहितीनुसार, हे आंतरराष्ट्रीय नंबर सिंगापूर, व्हिएतनाम आणि मलेशिया या देशाचे आहेत. या नंबरवरुन आलेला कॉल उचलल्यावर आपला फायनॅशियल डेटा समोरची व्यक्ती चोरी करु शकते. जर यात अडकून तुमची फसवूणक झाली असेल तर तुम्ही cybercrime.gov.in वर जाऊन तक्रार करु शकता.
भारतीयांवर होतोय सायबर हल्ला
सायबर इंटलिजन्स अ‍ॅंड डिजिटल फोरेंसिक या विभागातील एका अधिकाऱ्याने नाव न छापण्याच्या अटीवर ANI ला सांगितले की, हा एक नव्या पद्धतीचा सायबर क्राइम ट्रेंड आहे. संपूर्ण भारतातील लोकांना व्हाट्सअ‍ॅपवर +254, +84, +63, +1 (218) यांसारख्या अन्य आंतरराष्ट्रीय नंबर्सवरुन कॉल किंवा मेसेज येत आहेत. या कॉल आणि मेसेजना प्रतिसाद देणारे बहुसंख्य सायबर क्राइमचे शिकार बनले आहेत. अशा प्रकारे होणाऱ्या फसवणूकीमध्ये दररोज वाढ होत आहे. दुसऱ्या अधिकाऱ्याने आंतरराष्ट्रीय नंबरवरुन कॉल किंवा मेसेज आल्यावर ते नंबर रिपोर्ट आणि ब्लॉक करण्याचा सल्ला दिला आहे. तज्ज्ञांनुसार, हे कॉल आणि मेसेज सकाळी ६-७ वाजल्यापासून ते रात्री कधीही येऊ शकतात. सरकारी कर्मचाऱ्यांपासून ते तरुण मुलांपर्यंत कोणत्याही गटातील/ वर्गातील नागरिकांना हे फेक कॉल येत आहेत.
कॉल उचलल्यावर /मेसेज आल्यावर काय होते?
+243 ने सुरु होणाऱ्या एका नंबरद्वारे पाठवण्यात आलेल्या एका मेसेजमध्ये “नमस्कार, माझ नाव अलीना आहे. मला तुमची काही मिनिटं मिळतील का?” असे लिहिले होते. त्यात पुढे “सध्या 5G इंटरनेटचे युग आहे. लोक इंटरनेटच्या माध्यमातून पैसे कमावत आहेत. तुम्हालाही हे ठाऊक असेल. पैसे कमावण्यासाठी तुम्ही मला जोडले जाऊ शकता. मला आशा आहे की, तुम्ही माझ्या या मेसेजला नक्की रिप्लॉय द्याल.” असे लिहिले होते.
