देशात ५ जी सेवा सुरू झाल्यानंतर रिलायन्स जिओ आणि एअरटेल या दोन दूरसंचार कंपन्यांकडून काही निवडक शहरांमध्ये ५ जी सेवा दिली जात आहे. रिलायन्स जिओ मुंबई, दिल्ली, चेन्नई, वाराणसी, नाथद्वार आणि कोलकातामध्ये ५ जी सेवा देत आहे. आता यामध्ये आणखी दोन शहरांचा समावेश झाला आहे. आता रिलायन्सने बंगळुरू आणि हैदराबाद या दोन शहरांमध्येही ५ जी सेवा सुरू केली आहे. माय जिओ अ‍ॅपवर आमंत्रण मिळाल्यानंतर या दोन्ही शहरांतील युजर्सना ५ जी सेवा वापरता येईल.
५ जी स्मार्टफोनच्या सहायाने युजरला जिओच्या ५ जी सेवेचा लाभ घेता येईल. फोन निर्मिती कंपन्यांनीही ५ जी सेवा सुरळीत वापरता यावी यासाठी आपल्या फोन्सना ५ अपडेट देणे सुरू केले आहे. रिल्यान्सने विशेष लाँच ऑफर देखील सादर केला आहे. जिओ काही पात्र युजर्सना ५०० ते १ जीबी प्रति सेकंद स्पीडसह अमर्यादित ५ जी डेटा वापरण्याची ऑफर देत आहे.
(भारतात TWITTER BLUE सेवा सुरू; दर महिन्याला किती पैसे खर्च करावे लागतील? जाणून घ्या)
जियो ५ जी सेवा मिळत असलेल्या शहरांमध्ये तुम्ही राहात असाल तर माय जिओ अ‍ॅपकडून तुम्हाला ५ जी वेल्कम ऑफरबाबत सूचना येईल. सूचना मिळूनही जर तुमचा फोन ५ जी नेटवर्कशी जोडला जात नसेल तर तुम्ही पुढील स्टेप्स फॉलो करून फोनमध्ये ५ जी नेटवर्क सुरू करू शकता.
- फोनच्या सेटिंग्समध्ये जा.
- मोबाईल नेटवर्कवर टॅप करा.
- त्यानंतर जिओ सिम निवडा आणि ‘प्रिफर्ड नेटवर्क टाइप’वर टॅप करा.
- यामध्ये तुम्हाला ३ जी, ४ जी, ५ जी हे पर्याय दिसून येतील. यातील ५ जी निवडा. यानंतर तुम्हाला फोनच्या डिस्प्लेवर वरच्या भागात ५ जीचे चिन्ह दिसून येईल.
नवीन सीम घेण्याची गरज नाही
दरम्यान ५ जी सेवा वापरण्यासाठी नवीन सीम घेण्याची गरज नसल्याचे जिओ आणि एअरटेलने स्पष्ट केले आहे. ५ जी सेवा सुरू झाल्यावर विद्यमान ४ जी सीम ५ जी सेवेशी जोडल्या जाईल.
