व्हॉट्सॲपची मूळ कंपनी मेटा भारतात व्हॉट्सॲपची सेवा बंद करणार असल्याच्या चर्चा किंवा त्याबाबत अनेक तर्कवितर्क लावले जात आहेत. मात्र, याबाबत केंद्रीय मंत्री अश्विनी वैष्णव यांनी स्पष्टीकरण दिलं आहे. मेटाने भारतातील त्यांची व्हॉट्सॲपची सेवा बंद करण्याच्या कोणत्याही योजनेसंदर्भातील माहिती सरकारला दिलेली नाही, अशी माहिती मंत्री अश्विनी वैष्णव यांनी शुक्रवारी राज्यसभेत बोलताना दिली.
माहिती तंत्रज्ञान कायदा, २००० च्या कलम ६९ ए नुसार सरकारच्या निर्देशांनुसार वापरकर्त्यांचे तपशील सामायिक करण्याच्या सरकारच्या निर्देशांमुळे व्हॉट्सॲप भारतात आपली सेवा बंद करण्याचा विचार करत आहे का? असा सवाल काँग्रेस खासदार विवेक तन्खा यांनी विचारला होता. त्यानंतर मंत्री अश्विनी वैष्णव यांनी खासदार विवेक तन्खा यांच्या व्हॉट्सॲपच्या सेंवाबद्दलच्या प्रश्नांवर उत्तर दिलं. मंत्री अश्विनी वैष्णव यांनी म्हटलं की, “व्हॉट्सॲप आणि त्याची मूळ कंपनी मेटा यांनी भारतातील व्हॉट्सॲपच्या त्यांच्या सेवा बंद करण्याच्या योजनेबाबत कोणतीही माहिती सरकारला दिलेली नाही”, असं त्यांनी केलं. दरम्यान, याबाबतचं वृत्त टाइम्स ऑफ इंडियाने दिलं आहे.
दरम्यान, वापरकर्त्याचे तपशील शेअर करण्याच्या निर्देशांमुळे व्हॉट्सॲप भारतात आपली सेवा बंद करण्याचा विचार करत आहे का? यापूर्वी व्हॉट्सॲपने नवीन सुधारित आयटीच्या नियमांना आव्हान दिलं होतं. यासंदर्भात व्हॉट्सॲपने दिल्ली उच्च न्यायालयामध्ये सांगितलं होतं की जर सरकारने संदेशांचे एन्क्रिप्शन तोडण्यास भाग पाडले तर ते भारतात काम करणे थांबवेल. तसेच सोशल मीडिया प्लॅटफॉर्मवरील निर्बंधांबाबतच्या प्रश्नावर उत्तर देताना मंत्री अश्विनी वैष्णव यांनी सांगितलं की, केंद्र सरकारने भारताचे सार्वभौमत्व किंवा अखंडता, भारताचे संरक्षण, राज्याची सुरक्षा, परकीय राज्यांशी मैत्रीपूर्ण संबंध किंवा सार्वजनिक सुव्यवस्थेच्या हितासाठी निर्देश जारी केले आहेत.
© IE Online Media Services (P) Ltd