करोनाच्या संकटामुळे राज्यात कडक निर्बंध लागू करण्यात आलेले आहेत. दुपारी चारनंतर दुकानं बंद करण्याचे आदेश आहेत. मात्र, असतानाही ठाण्यात भरवस्तीमध्ये सर्रासपणे डान्सबारमध्ये छमछम सुरू असल्याचं समोर आलं होतं. ही माहिती समोर आल्यानंतर याची राज्याचे गृहमंत्री दिलीप वळसे-पाटील यांनी गंभीर दखल घेत कारवाई करण्याचे आदेश दिले होते. त्यानंतर आयुक्त जयजित सिंह यांनी दोन वरिष्ठ पोलीस निरीक्षकांना निलंबित केलं आहे. तर दोन सहाय्यक पोलीस आयुक्तांच्या बदल्या करण्यात आल्या आहेत. ठाणे शहर परिसरातील नौपाडा पोलीस ठाणे हद्दीत आम्रपाली आणि अँटीक पॅलेस या दोन डान्सबारसह वर्तकनगर पोलीस ठाणे कार्यक्षेत्रात येणारा नटराज डान्सबार निर्बंध असतानाही बिनदिक्कतपणे सुरू असल्याची माहिती समोर आली होती. या डान्सबारमध्ये करोना नियमांची पायमल्ली सुरू असल्याचं व्हिडीओत दिसून आलं होतं. हे प्रकरण समोर आल्यानंतर गृहमंत्री दिलीप वळसे-पाटील यांनी गंभीर दखल घेतली. या प्रकरणी गृहमंत्र्यांनी पोलीस महासंचालकांना चौकशीचे आदेश दिले. याप्रकरणी ठाण्याच्या पोलीस आयुक्तांनी प्राथमिक चौकशीच्या आधारावर नौपाडा पोलीस ठाण्याचे वरिष्ठ पोलीस निरीक्षक अनिल मांगले आणि वर्तकनगर पोलीस ठाण्याचे वरिष्ठ पोलीस निरीक्षक संजय गायकवाड यांच्यावर सोमवारी निलंबनाची कारवाई केली. Two senior police inspectors were suspended & two Assistant Commissioners of Police (ACPs) were transferred after dance bars in their jurisdictions (Naupada & Vartak Nagar) were found functional, flouting COVID norms. Matter under investigation: Thane Police#Maharashtra — ANI (@ANI) July 20, 2021 याप्रकरणी नौपाडा विभागाच्या सहाय्यक पोलीस आयुक्त नीता पाडवी आणि वर्तकनगर विभागाचे सहायक पोलीस आयुक्त पंकज शिरसाट यांच्यावरही कारवाई करण्यात आली आहे. दोन्ही सहाय्यक पोलीस आयुक्तांच्या तडकाफडकी बदल्या करण्यात आल्या आहेत. तर आम्रपाली, अँटीक पॅलेस आणि नटराज या तिन्ही बारचा परवानाही रद्द करण्यात आला आहे.
