डोंबिवली – येथील ठाकुरवाडी भागात राहत असलेला एक १७ वर्षांचा अल्पवयीन तरुण दुचाकी घेऊन ठाकुर्लीमधून जात होता. या तरुणाचे दुचाकीवरील नियंत्रण सुटले आणि त्याने एका पादचाऱ्याला जोराची धडक देऊन गंभीर जखमी केले.
डोंबिवलीतील सतीश शिंदे आणि अविनाश कदम हे मंगळवारी दुपारी ठाकुर्ली येथे पायी जात होते. रस्ता ओलांडत असताना त्यांच्यासमोर आरोपी अल्पवयीन दुचाकी घेऊन आला. त्याला दुचाकी नियंत्रित झाली नाही. त्याने अविनाश कदम यांना जोरदार धडक दिली. त्यांच्या हात, पायाला गंभीर दुखापत झाली.
हेही वाचा – आता मुरबाडपर्यंत गोदामांच्या रांग; भिवंडीचे व्यापार केंद्र विस्तारण्याच्या हालचाली
अल्पवयीन दुचाकीस्वाराच्या निष्काळजीपणामुळे हा अपघात झाल्याने तक्रारदार सतीश शिंदे यांनी रामनगर पोलीस ठाण्यात तक्रार केली आहे. पोलिसांनी या तरुणाविरुद्ध गुन्हा दाखल केला आहे. १८ वर्षांखाली तरुणाने वाहन चालविणे कायद्याने गुन्हा आहे हे माहिती असूनही या १७ वर्षांच्या अल्पवयीन तरुणाने दुचाकी चालविल्याने त्याच्या पालकांवर वाहतूक पोलिसांनी मोटार वाहन कायद्याने कारवाई करावी, अशी मागणी नागरिकांकडून करण्यात येत आहे.
