कल्याण: एका खासगी मोटार चालकाने शुक्रवारी पहाटे एका २३ वर्षाच्या नोकरदार महिलेवर लैंगिक अत्याचार करण्याचा प्रयत्न केला. तरूणीने ओरडा केल्यानंतर मोटार चालक तरूणीला कल्याण पूर्वेतील सूचकनाका भागात सोडून पळून गेला. या मोटार चालकाचे नाव राकेश मिश्रा आहे. त्याच्या मोटारीच्या वाहन क्रमांकावरून पोलिसांनी चालक मिश्राचे नाव शोधले.
कल्याण पूर्व भागात राहणारी तरूणी नवी मुंबईत एका खासगी कंपनीत नोकरी करते. शुक्रवारी ती कामावर गेली होती. शनिवारी पहाटे तीनच्या सुमारास खासगी मोटारची नोंदणी करून (कॅब) ती कल्याणमध्ये येत होती. मोटीरीत पीडित तरूणी एकटीच होती. शिळफाटा रस्त्याने मोटार कल्याण पूर्व भागात सूचक नाका भागात येताच चालकाने वाहन थांबवून या तरूणीवर लैंगिक अत्याचार करण्याचा प्रयत्न केला. या तरूणीने ओरडा करताच चालक मोटारीसह पळून गेला.
हेही वाचा >>> पलावामध्ये चार वर्षाची बालिका पाचव्या माळ्यावरून पडून गंभीर जखमी
कोळसेवाडी पोलीस ठाण्यात तरूणीने तक्रार केली आहे. वरिष्ठ पोलीस निरीक्षक महेंद्र देशमुख यांच्या मार्गदर्शनाखाली साहाय्यक पोलीस निरीक्षक एस. डी. डोके हे सूचकनाका भागातील सीसीटीव्ही तपासून चालकाचा शोध घेत आहेत. या चालकाच्या अटकेसाठी एक विशेष पोलीस पथक तयार करण्यात आले आहे. नोकरदारांनी रात्रीच्या वेळेत खासगी मोटारीत बसण्यापूर्वी संबंधित मोटारीचा वाहन क्रमांक लिहून ठेवावा. चालकाच्या संशयास्पद हालचाली दिसल्यास तातडीने जवळच्या पोलीस ठाण्याशी संपर्क साधण्याचे आवाहन वरिष्ठ निरीक्षक देशमुख यांनी केले आहे.
